Сай-Өтесте полицейлер мен теміржолшылар қылмысқа бірлесе қарсы тұруға уағдаласты
Маңғыстау облысы бойынша меншікті тілші
Сай-Өтес станциясында желілік полиция өкілдері теміржолшылармен бас қосты. Ортақ тақырып – теміржол бойындағы тәртіп, ұрлық-қарлыққа қарсы күрес.
Кездесуде теміржол мекемесінің басшылары сөз алып, орын алып отырған келеңсіз оқиғалар, олардан келген материалдық шығын жайлы сөз қозғады. Әсіресе, теміржол төсемінің материалдарын ұр- лаудың қозғалыс қауіпсіздігіне қауіп төндіретіні, сондықтан ендігі жерде бұл мәселеге көзжұма қарап, ұзын арқан кең тұсауға салмай, қылмыс жасағандарды қатаң жазаға тартуға шақырды.
– Жергілікті теміржолшылармен кездесіп, қозғалыс қауіпсіздігінің сақталуына кедергі келтіретін келеңсіз жайттармен күресте бірлесе әрекет етіп, сақтықты күшейту жайын талқыладық.
Теміржол мүлкінің ұрлануына жол бермеу және телімдерде тәртіпті күшейтіп, теміржол көлігіне сенім артқан тұтынушылар жүктерінің қолды болмауын қадағалау жөніндегі шараларды қарастырдық. Сонымен қатар теміржол бойында қараусыз жайылып жүрген малдың мәселесі де сөз болды. «Теміржол көлігі туралы» және басқа да теміржол көлігіндегі нормативтік-құқықтық актілерге сәйкес қоршалмаған учаскеде малды теміржолдан 300 метр қашықтықта, ал теміржолдан 200 метр қашықтықта үнемі қадағалаумен ғана бағуға рұқсат етілетіні халыққа түсіндіру ескертілді, – дейді Сай-Өтес станциясындағы желілік полиция бөлімшесінің басшысы Нұрлыбек Рахметов.