Мәжіліс депутаттары теміржолшылар арасында
Қызылорда облысы бойынша меншікті тілші
Өңірлерді аралап сайлаушыларымен кездесу өткізіп жүрген халық қалаулылары Президент жүктеген міндеттерді көпшілікке жеткізіп, қарапайым жұмысшылардың өтініш-тілектерін тыңдауда.
Осы аптада Парламент Мәжілісінің депутаттары, «Amanat» партиясы фракциясының мүшелері Бақытбек Смағұлов пен Геннадий Шиповских Қызылорда локомотив пайдалану депосының ұжымымен кездесті. Халық қалаулыларын теміржолшылар жылы қабылдады. Өйткені, кездесуге келіп отырған Геннадий Шиповских өз орталарынан шыққан кешегі теміржолшы-машинист еді. Кезегімен сөз алған депутаттар теміржол саласын одан әрі дамытуда «ҚТЖ» компаниясы тарапынан жасалған жұмыстардың жүзеге асырылуы деңгеймен танысып, ашық пікір алмасу арқылы негізгі проблемалық мәселелерін анықтап, оның заңнамалық тұрғыдан жүзеге асуына қолдау білдіретіндерін жеткізді. Кездесу барысында сала дамуына қатысты мәселелермен қатар ел ішіндегі ахуал, қазіргі таңда орын алып отырған қымбатшылық жайы да сөз болды.
– Локомотив шаруашылығы – теміржол саласының қозғаушы күші. Өзім сайланған өңірдің ахуалымен танысу, бірге жұмыс жасаған әріптестерімнің жағдайын білу, мемлекеттік бағдарламаның жергілікті жерде жүзеге асу барысын көру мақсатында келдім. Қарапайым еңбек адамдарының әлеуметтік тұрғыдан қорғалу жағдайын назарға алдым. Барлық көтерілген өзекті мәселелерді тиісті мемлекеттік органдарға жеткіземін, оның шешілуіне атсалысамын, сөз жүзінде емес, іс жүзінде жұмыс жасаймын, – деді Парламент Мәжілісінің жас депутаты Генадий Шиповских.