Жаңа типті қосын салынды
Атырау облысы бойынша меншікті тілші
Құлсары белгі беру және байланыс дистанциясы Құлсары-Бейнеу телімінің 467-бекетіндегі ескі электрик орталықтандыру қосынын жаңа типті модернизацияланған постқа ауыстырды.
Жаңа ЭО-пост жұмысты әлдеқайда жеңілдетті, ең бастысы шапшаңдық пен сенімділік шұғыл әрекет етуге, өнімді жұмыс жасауға мүмкіндік берді.
– Мұнда бағдаршамдар, бұрмалар, басқа да белгі беру құрылғылары автоматты түрде басқарылады. Айта кетерлігі, дистанция мамандары ЭО қосынының жаңа ғимаратқа көшіріліп, желілерді қайта жалғау жұмыстарын өз күштерімен жүргізіп, барлық тетіктерін іске қосты. Енді қыркүйек айына 465-бекетін де жаңа типті модернизацияланған электрлік орталықтандырылған постқа ауыстыру жұмыстары жоспарланып отыр, – дейді бөлімшенің СОБ және электрмен қамтамасыз ету бөлімінің бастығы Амангелді Бержанов.
Сондай-ақ, былтырғы жылы сигнализация және байланыс шаруашылығы бойынша бірқатар учаскелерде қозғалыс қауіпсіздігін қамтамасыз ету үшін жүріп бара жатқан жылжымалы құрамның техникалық жағдайына автоматты бақылау жасайтын КТСМ құрылғысы іске қосылған болатын. Құлсары және Атырау дистанцияларында Мақат-Құлсары учаскесі бойынша Бек-Бике разъезінде, Құлсары-Бейнеу учаскесінде Қоркөл станциясында, Атырау-Ақсарай учаскесі бойынша Тұманды мен Д.Нұрпейсова бекеттерінде 7 дана контейнерлік типтегі жаңартылған модульді техникалық құралдар кешені орнатылған. Биылғы жылдың 3-ші тоқсанына да Атырау белгі беру және байланыс дистанциясында Атырау-Қиғаш телімінің Аққыстау, Исатай, Афанасьево бекеттеріне пойыз қозғалысы кезінде жылжымалы құрамның техникалық жағдайын автоматты түрде бақылауға арналған 6 дана жаңартылған контейнерлік техникалық жабдықтар кешенінің жүріс модульдерін орнату жұмыстары жоспарланып отыр.