Жолаушы вагонына – сапалы қызмет

«Вагонсервис» АҚ-ның Маңғыстау телімінде жұмыс қызып тұр. Теміржолшылар жолаушы тасымалы артқан маусымда вагондарды уақытылы сапарға дайындап жолға салу үшін барын салып жатыр.

Ең үлкен бағыттардың бірі – №037-038 пойызы қатынайтын Маңғыстау-Семей бағдары. Бұл – жұп күндері келетін құрам. Сондықтан бұл күндері ТҚ-1 техникалық қызметінен күніне 1-2 құрам өтеді. Жалпы бағытта үш құрам, әрқайсысында 17-18 вагоннан бар. Кейде билетке сұраныс көбейіп, қосымша вагондар шығарылса, бұл қызметке жүгінетін вагондар саны да арта түседі екен.  

– Бір-екі жыл бұрын Маңғыстау-Алматы пойызының екі құрамасына қызмет көрсететін едік. Ол қазір Алматыдағы әріптестеріміздің еншісінде. Бізде енді қатынасы жағынан Семейге қатынайтын пойыздан кейінгі орында тұрған бағыттар – Маңғыстау-Атырау- Ақтөбе. Бұлар екі күн сайын келіп, қызметін алып кетеді. Одан бөлек халықаралық бағытта жүретін төрт вагонымыз бар. Ол – Маңғыстау-Астрахань тіркеме вагондары. Оған тақ күндері қызмет көрсетіледі. №657-658 Маңғыстау-Бейнеу жекеменшіктегі қаламаңы тасымалы да бізден қызметтен өтеді. Оның екі құрамы бар, жүргендіктен тиісті қызметте күнде жасалады. Жалпы, қай-қайсы маршрутта, қандай пойыз болмасын бәріне техникалық қызметті сапалы және дер уақытында көрсетуге күш саламыз, – дейді «Вагонсервис» АҚ Маңғыстау телімінің шебері Қосай Сейтқалиев. 

Мекемеде осы айдың ішінде 7 вагонға ТҚ-3 санатындағы жөндеу жүргізілген. Жарты жылдан өтетін мұндай жөндеуге келесі айда тағы да 20 шақты вагон жоспарланған. Сонымен қатар жақында оншақты вагон жылына бір рет жасалатын деполық жөндеуге Қызылордаға жіберілген. Бұл вагондар сол жақта толық ревизиядан өтіп, ақаулары жөнделіп, 20-25 күннен кейін келіп, қатарға қайта қосылады екен.