Достық станциясының теміржолшыларын құттықтады
«Қазақстан теміржолшысы» газетінің тілшісі
Шекарадағы Достық станциясының теміржолшыларын төл мерекемен еліміздің өнер жұлдыздары да құттықтап, әннен шашу шашты.
Станция бастығының міндетін атқарушы Мақсат Мамбетқұлов теміржолшыларды мерекемен құттықтап, марапаттарын табыс етті. Атап айтқанда, станцияның 18 қызметкері мен түрлі құрылымдық бөлімшелердің 23 теміржолшысының мерейі үстем болды. «Адал еңбегі үшін» белгісімен пойыз құрастырушы Марат Мейізбаев, «Кәсібі бойынша үздік» атағымен тасымалдау құжаттарын өңдеу агенті Қуатбек Қоңырбаев, «Үздік маман» атағымен жүк және багаж іздеу бюросының меңгерушісі Мейрамгүл Омарбаева марапатталды. Одан бөлек ұлттық компания басшысы мен «ҚТЖ-Жүк тасымалы» ЖШС басшысының марапаттары табысталды.
Теміржолшылардың балалары арасында мерекеге орай ұйымдастырылған «Достық станциясының болашағы» атты сурет салу байқауының нәтижелері де жария болды. Қазылар алқасының шешімімен 3 баланың суреті жоғары бағаланып, авторларына сыйлықтар берілді. Мерекелік іс-шара көңілді концерт пен спорт ойындарына жалғасты. Бағдарлама аясында еліміздің эстрада жұздыздары – Ерлан Али, Renzo тобының әншісі Есет Жарылқасынов, Берік Сансызбай, Мұхтар Албан теміржолшыларды құттықтап, әннен шашу шашты. Кеш соңы мерекелік отшашуға ұласты.