Конституция – басты құжат
Қызылорда облысы бойынша меншікті тілші
ҚР Конституция күніне орай Қызылорда теміржолшыларының партия активтері мен мекеме заңгерлері, «AMANAT» партиясының Теміржол филиалының белсенділері дөңгелек үстел өткізді, деп хабарлайды Rail-news.kz.
Барлық заң мен заңнамалардың бастауы болып табылатын құнды құжат – Конституцияны құрметтеу, қоғамда заңдылықтың сақталуы мен тәртіптің нығаюы, адам құқығының бұзылуына жол бермеуді мақсат еткен жиында ой-пікірлер тыңдалып, ұсыныстар айтылды.
«AMANAT» партиясы «Теміржол» филиалының атқарушы хатшысы Базара Танбаева шараға қатысушыларды ҚР Конституциясы күні мерекесімен құттықтап, Тәуелсіз ел тұғырының беріктігі, Заңның айбындылығы жайында ой қозғады.
– Бүгінде елімізде ауқымды өзгерістер мен тың бастамалар қолға алынды. Жаңа Қазақстанды дамытудың жаңа кезеңінде бәрі Ата Заңның аясында жүзеге асырылып, еліміз заман талабына сай жаңғыра берсін. Біздің саяси, экономикалық, әлеуметтік саладағы бастамаларымыз ең алдымен Конституцияға негізделеді. Ол – мемлекетіміздің негізін берік қалыптастырған басты құжат, – деді Базара Танбаева.
Шара барысында жүктелген тапсырмаларды абыроймен атқарып жатқан теміржолшылардың еңбектеріне тоқталып, Конституцияға деген құрметті нақты іспен, адал еңбекпен, заңға мойынсұнумен дәлелдеу керектігі жайлы ой пікірлер айтылды. Сондай-ақ қоғамдық жұмыста белсенділік танытқан партия мүшелері алғыс хатпен марапатталды.