Теміржолшыларға құрмет көрсетілді

Қызылорда жүк тасымалы қосалқы бөлімінің бастығы Батырхан Базарбаев аймақ темір жолына еңбегі сіңген бір топ теміржолшылармен кездесті.

 Олардың арасында қырық жылдан астам уақыт Қызылорда бөлімшесінде абыройлы қызмет атқарған жүк бөлімінің басшысы Ақылбек Жалғасбаев пен жетекші инженер Гүлнәр Балықбаеваға айрықша құрмет көрсетілді. Қос теміржолшы бүгін зейнет жасына жетіп, ендігі жерде ұзақ жылғы еңбегінің жемісін көруге аттанбақ.  

Талай жыл кәсіби міндеттерін мінсіз атқара жүріп тек абырой жинаған қос теміржолшыға әріптестері алғысқа толы ықылас-тілектерін білдіріп, естелік сыйлықтарын тапсырды.  

– Президентіміз күні кешегі Жолдауында қоғамда кәсібилік пен еңбекқорлық ең жоғары орында тұруы керек және қарапайым еңбек адамына құрмет көрсету керек деді. Өз саласының кәсіби маманына да сұраныс жоғары болады. Сіздер, аймақ темір жолы үшін сондай бағалы маман болдыңыздар. Кейінгі буын сіздерден үлгі алса дейміз, – деді мерейтой иелеріне құттықтау адресатын табыстаған Батырхан Базарбаев.  

Жиында Қызылорда теміржолының дамуы жолында талай жылдардан бері тынымсыз тер төгіп келе жатқан Жарқынбек Рсымбетов, Күлхан Белкібаев, Шәмшагүл Алпысбаева, Кенжебек Саяұлы сынды бір топ теміржолшылар «ҚТЖ-25 жыл» мерейтойлық медалімен марапатталып, мерейлері үстем болды.