Мамандарға әдістемелік көмек көрсетілді
Тараз қаласы бойынша меншікті тілші
Жуырда Жамбыл белгі беру және байланыс дистанциясында Қазақстан темір жолындағы «Өнертапқыштық міндеттемелер» тақырыбында тренинг өтті. Шараға теміржол мекемелеріндегі рационализаторлық жұмыстарға жетекшілік ететін жауапты мамандар қатысты.
Жиынды ашқан Жамбыл магистральдық желі бөлімшесінің Ғылыми-техникалық ақпарат және сараптау орталығының басшысы Динара Жанұзақова өнертапқыштық тек қана өндірістік процестерді жақсарту мақсатында ғана жүргізілмей, ұжымдық-шығармашылық атмосфераны қалыптастырып, командалық ынтымақ беріктігінің де көрсеткіші деді.
Жалпы, бүгінгі күні Ғылыми-техникалық ақпарат және сараптау орталығының басшылығымен Жамбыл магистральдық желі бөлімшесі өзіне қарасты 20 мекемеде өндірістік-экономикалық міндеттемелерді үйлестірсе, Жамбыл жүк тасымалы бөлімшесі станциялардан бөлек Жамбыл вагон жөндеу депосы, Жамбыл локомотив пайдалану депосы және Шу локомотив пайдалану депосында өндірістік-экономикалық міндеттемелерді үйлестіріп отыр.
Осы жылы Луговой рельс дәнекерлеу кәсіпорнының метролог-экологы Дәулетхан Шөкеев 2021 жылдың қорытындысымен «Үздік өнертапқыш» атанып, арнайы төсбелгімен марапатталды. Болат жолда еңбек етіп келе жатқан жылдар белесінде ол 25 өнертапқыштық ұсыныс жасап, өндіріске енгізген. Оның ішінде қомақты қаржылық экономикалық тиімділігін көрсетіп отырған төрт ұсыныс бар.
– Тренингке қатысушылар Өнертапқыштық міндеттемелер тәртібінің жаңа бұйрықтарымен және өзгерістерімен танысты. Сондай-ақ, жұмысты бағалау критерийлерінің өзгерістері мен өндіріске енгізілген өнертапқыштық ұсыныстарды қаржылай өтеу мөлшерін, формасын, өнертапқыштық міндеттемелерді қалай құқықтық қорғаумен қамтамасыз ету жолдарын талқылады. Қатысушылардан өнертапқыштық ұсыныстарды сауатты рәсімдеу бойынша тест алынды. Тапсырмалар берілді, – дейді Динара Болатқызы.
Айтуынша, тренинг мамандарға айтарлықтай әдістемелік көмек көрсеткен. Осы жылдың екінші тоқсанында Жамбыл бөлімшесі бойынша 28 өнертапқыштық ұсыныс қабылданып, оның 27-і өндіріске енгізіліп отыр. Жоспар 96,4 пайызға орындалған. Жиын соңында үздік идеяларымен көзге түскен өнертапқыштар марапатталды.