Өнертапқыштар деңгейі өсіп келеді
Түркістан облысы бойынша меншікті тілші
«ҚТЖ-Жүк тасымалы» ЖШС Шымкент филиалы мен Шымкент магистральдық желі бөлімшесі мамандарының қатысуымен рационализаторлық белсенділікті арттыру мақсатында арнайы тренинг өтті.
Жиынның басты мақсаты өнертапқыштық белсенділікті арттыра отырып, техникалық шығармашылықты дамыту болды. Ғылыми-техникалық ақпарат бөлімінің меңгерушісі Ләззат Әбутәліпқызының ұйымдастыруымен өткен жиынға Шымкент магистральдық желі бөлімшесі филиалының бас инженері Мұхтарбай Битеміров пен Шымкент жүк тасымалы бөлімшесінің бас инженері Іляс Нұржанов, техникалық және өндірістік бөлім басшылары мен қызметкерлері қатысып, біліктіліктерін шыңдады.
Жиында еңбек нәтижесіне деген қызығушылықты ояту арқылы теміржолшыларды техникалық қызмет үшін моральдық және материалдық тұрғыдан ынталандыру, осылайша қоғам сұранысын қамтамасыз ету мәселесі күн тәртібіне шығарылды. Нәтижесінде компания мен еншілес ұйымдардың шығындары оңтайланып, шығындар азаяды деген болжам бар.
«Біз өз мамандарымыздың рационализаторлық ұсыныстарын қолдай отырып, авторлық құқықтарын қамтамасыз етеміз. Қуантарлығы, бүгінде өндіріс талабы өскен сайын өнертапқыштық ұсыныстардың да деңгейі өсіп келеді. Баяғыдай қарапайым емес, жылдан-жылға күрделі, сонымен қатар тиімді, табысты ұсыныстар ойлап тауып, өндіріске қосып жатқан әріптестеріміздің еңбегіне тек қол соғып қолдау білдіреміз. Ал өнертапқыш – шығармашылық еңбек, кез келген еңбек лайықты бағаланып, ынталандырылуы қажет», – деді жиында сөз алған Іляс Бахрамұлы.
Біліктілікті шыңдау шарасына осы кезге дейін «Үздік рационализатор» атанып, кеудесіне төсбелгі таққан білікті мамандар да қатысты. Олар – Исламхан Алтаев пен Алмас Қонысов, Галина Попова мен Бекжан Билібаев сынды азаматтар. 2021 жылы Исламхан Нұртайұлы ұсынған РП-176В рационализаторлық еңбегінің экономикалық тиімділігі нәтижесінде 2 592 519 теңге үнемделген. Бұл компанияның өндірістік жұмыста игерген үлкен олжасы саналады.
Озық өнегені өзгеге үлгі ету мақсатында ұйымдастырылған шарада осынау үздік рационализаторлар өз ойларын ортаға салып, тәжірибесімен бөлісті. Басшылық техникалық информатор әрі рационализатор ретінде танылып келе жатқан Ғани Иманғалиұлы, Нұрсұлтан Бауыржанұлы, Назгүл Айтмырзақызы, Жарқын Қайратұлы, Саламат Әнесұлы, Нұржан Смайылбекұлы, Нәдір Ғазизұлы, Мәлік Бақтиярұлы, Жұмабек Батырханұлы сияқты мамандарға сенім артып, қызметтеріне сәттілік тіледі.