Республика күніне орай теміржолшылар марапатқа ие болды
Қызылорда облысы бойынша меншікті тілші
Қызылорда магистральдық желі бөлімшесіне қарасты Сексеуіл жол дистанциясының жиырмаға жуық жолшысы Республика күні мерекесіне орай марапатқа ие болды.
Пойыздардың қозғалыс қауіпсіздігі сақталуына ерекше үлес қосып жүрген болат жолдың бағбандары Артур Мендалиев, Айболат Мамитов, Балтабай Мырзағұлов, Аманжол Құлжанов, Берік Әбдіхалықов, Марат Байманов, Бекболат Сатаев, Еламан Теңізбаев, Қуаныш Мұхамедшәріпов, Асылбек Молмаханов, Жанатбек Тайлауов, Асқарбек Елеуов, Аманкелді Балабатыров, Жанкелді Раймқұлов, Марат Алпысбаев және Жеңісбек Сейілханов еңбектері ерекше аталып өтіп, Құрмет грамотасы мен Алғыс хатқа ие болды.
Сонымен қатар, мереке құрметіне осыған дейін түрлі себептерге байланысты 22 адамның сөгіс, ескерту секілді тәртіптік жазасы кешірілгені де жолшылар ұжымы үшін жағымды жаңалық болды.
Осындай мерекелік шара Қызылорда жол дистанциясында да өтіп, онда да озаттарға құрмет көрсетіліп, кәсіподақ ұйымы тарапынан әзірленген сыйлықтар табыс етілді. Ал Жосалы теміржол вокзалында дастархан жайылып, әрі-бері өткен пойыз жолаушыларына сыр өнімдерінен ауыз тиюге мүмкіндік жасалды. Сырдың тәтті қауыны мен ыстық бауырсағынан, құрт-майынан дәм татқан жолаушылар теміржолшыларға алғыс айтып, сапарларын әрі қарай жалғастырды.