Нұрлан Ноғаев Болашақ станциясында болды
Маңғыстау облысы бойынша меншікті тілші
Маңғыстау облысының басшысы Нұрлан Ноғаев Болашақ станциясында болды. Өңірдегі шекара бекеттерін аралаған әкім «Болашақ» шекара бекеті мен «Темір-баба» өткізу пунктінің жұмысымен танысты.
Маңғыстау қосалқы бөлімінің бас инженері Қарақат Жақанов пен Болашақ станциясының бастығы Мақсат Нұрбеков облыс әкімін Түркіменстанмен шектесетін теміржол станциясымен таныстырды. Шаруашылық нысандарынан бөлек жергілікті тұрғындармен, теміржолшылармен кездесіп, ұсыныс-пікірлерін тыңдаған облыс басшысы вагондар паркін, жүктерді жөнелту процесін бақылап, шекарадан жүк өткізу үдерісінің қыр-сырына қанықты. Жылдан-жылға жоғарылаған жүк айналымына риза болып, теміржолшылар жұмысына сәттілік тіледі.
Болашақ станциясындағы жүк айналымы расымен мақтауға, мақтануға тұрарлық. Мәселен, былтыр Түркіменстанға 438 пойыз, 1 163 178 тонна жүк өткізілген. Олардан бізге 392 пойыз немесе 1 061 974 тонна жүк келген. Ал биылғы он айда Болашақ арқылы 1 604 742 тонна жүк жөнелтілсе, Түркіменстаннан 1 072 224 тонна жүк кірген. Яғни, он айдағы көрсеткіш өткен жылғы жылдық деңгейден асып түскен. Алда әлі екі ай бар, тасымал осы қарқынмен жалғасса, жылды жақсы нәтижемен қорытындылауға мүмкіндік мол.