Станция басшылығы қарт зейнеткерді 87 жасымен құттықтады
Атырау облысы бойынша меншікті тілші
Атырау өңіріндегі Ақжайық станциясының басшылығы осы станцияның қарт зейнеткері Қарлығаш Өрісбаеваны 87 жасымен құттықтап, кәсіподақ атынан азық-түлік себетін тарту етті.
Қарлығаш апа 1935 жылы туған. Қырық жылдай уақыт осы Гурьев-1 станциясында бұрма маманы болып қызмет етіп, тоқсаныншы жылдары зейнеткерлікке шыққан. Бүгінде 87 жасқа толған әже немере-шөберелерінің қызығын көріп отыр.
– Біз жұмыс жасаған уақыт соғыстан кейінгі қалпына келтіру жылдары еді. Ол кезде станция жаңа болатын және жұмыс ауқымы өте көп болды. Қаладағы жалғыз станция болғандықтан күніне ондаған пойыз келеді. Жұмыстың бәрі қолмен жасалатын. Мен стрелочница болып істедім. Осы жерден зейнетке шықтым. Өміріме ризамын. Кейінгі ұрпаққа Жаратқан қайырлы ғұмыр бергей, темір жол тозбасын, дами берсін, – деп ақжаулықты ана станция бастығы Есенжан Темірғалиев бастап келген әріптестеріне ақ батасын жаудырды.