Теміржолшылар қызметі қысқы режимге көшті

Бүгінде Семей ЖТ бөлімшесінің теміржолшылары қызметтің қысқы режиміне көшті.

Желі бойындағы барлық теміржол құрылымдары мен шаруашылықтары қатал маусымға толық даярлықпен кірісті. Осы орайда әсіресе жұмысқа жаңадан қабылданған, қысты теміржол бойында алғаш өткізушілермен іс жүргізуге басымдық берілуде. Биылғы жылы олардың саны 102 адам болып отыр. Бөлімше басшысының тапсырмасына сай әрбір жаңа еңбеккердің жанына тәжірибелі маманнан бекітіліп берілген.  

Жуырда шалғай станцияларда болып, ресми жұмыс сапарынан оралған бөлімшенің еңбекті қорғау бөлімінің бастығы Сәкен Жұмаділовтің айтуынша, арнайы киім, қыстық шұлық және аяқ киіммен қамту ісі қыркүйек айында 100 пайызды құрады. Бөлімшенің шаруашылық бөлімінің мамандары қажетті мүліктерді желі бойындағы барлық мекемелерге уақытында жеткізіп берген болатын. Әуелгі кезекте ашық далада еңбек ететін станциялар қызметкерлері, локомотив шаруашылықтарының мамандары, вагон қараушылар өткен қазан айында арнайы киімдерді қолдана бастады. Қажетті маусымдық киімдер – «A.V.Group», «АХБК», «ТаразКожОбувь», «Алтын Адам тігін фабрикасы», «Баязит» ЖШС сияқты отандық киім фабрикаларының өнімдері. Ал арнайы қорғаныш каскаларынан қажеттілікке қарай Семеймен Өскемен өңірлерінің әрқайсысына 20 бірліктен алыныпты. Дегенмен, жел өтінде жүретін теміржолшылар тарапынан сұраныстың мол болуы себепті өте төменгі температурада киюге арналған, қой жүнінен әзірленген етіктер биылғы жылы мол көлемде жеткізілді. Қазіргі күні қызметтік киімдермен қамту бойынша байтақ желі бойындағы теміржолшылар тарапынан шағым тіркелмепті.  

Сонымен қатар, биылғы жылы үсік шалғанға қарсы пайдаланылатын арнайы жақпа май да мол көлемде алынған. Оған негізінен вагон қараушылары мен пойыз құрастырушылар көптеп тапсырыс берген болатын. Бұл орайда «К&K Elite» ЖШС мекемесімен арнайы келісім жасалынып, медициналық қобдишалар сатып алынған.  

– Биыл қар да, суық та кеш түсті. Қысқа даярлық жұмыстарын жоғары деңгейде жүргізіп, кеңінен әзірлік жасауға мүмкіндіктеріміз аса мол. Дегенмен де бұл дайындығымызды алдағы ұзаққа созылатын қатал қыс сынайтын болады.