Машинистер де, машиналар да дайын

Ақтөбе локомотив пайдалану депосының тепловоздары қыс маусымына сақадай сай тұр. Биыл 50-ден аса тепловоз техникалық тексерістен өтті. Қызметкерлердің қысқы киіммен қамтылуы да жүз пайыз.

Ақтөбе локомотив пайдалану депосының басшысы Нұрлан Көшербаевтың айтуынша, биылғы қыс мезгілінде қозғалыс қауіпсіздігін қамтамасыз етуге бағытталған тұрақты шаралар тиянақты жүзеге асырылған. Тасымалдау кезеңіне сай тепловоздар техникалық тексерістен өтіп болды.  

«Пойыздардың қозғалыс қауіпсіздігін сақтау жұмыстары – күнделікті күн тәртібінен түспейтін міндеттер. Ұлттық компания техникалық және технологиялық даму жұмыстарына көп көңіл бөлуде. Әсіресе, басқару тиімділігін арттыру, негізгі құралдардың тозуын төмендетуге бағытталған жұмыстар басымдыққа ие. Қазіргі уақытта пайдалану депосының паркінде жалпы саны 63,5 тепловоз бар, соның 52,5 тепловозы қыс маусымына дайындалды», – дейді Нұрлан Көшербаев.

Депо цехтарының бірін аралап жүріп, отандық Локомотив құрастыру зауытының өнімі – ТЭ33А сериялы тепловозына техникалық тексеріс жүргізіліп жатқан жұмыстың үстінен түстік. Отын, ауамен қамтамасыз ету және су, май жүйелері тазартылып, ескірген қондырғылары ауыстырылып, жолға дайындалып жатты. Бұл жердегі күрделі тексеру жұмыстары 10 күн ішінде аяқталса, қысқа жөндеу мерзімдері 12 сағатқа созылады.  

«Локомотивтер мен техникалық қауіпсіздік құралдарын ұқыпты ұстап, істен шығармауға әрекет етеміз. Бұл дағды локомотив бригадаларының білімін жетілдіріп отыру арқылы қалыптасады. Осы ретте, қызметкерлер біліктілігін арттыру жұмыстары тұрақты ұйымдастырылғанын айтар едік. Техникалық сабақтар жоспарға сай апта сайын өтікізіліп тұрады. Демек, алдағы қыс маусымына машинистер де, машиналар да толық дайын», – дейді локомотив басшысы.  

Депода тасымалдау қызметін ұйымдастыруға 682 адам қызмет көрсетеді. Оның 309-ы машинист, 288-і машинист көмекшісі. Жұмысшылар қысқы киіммен жүз пайыз қамтамасыз етілген.