Еңбек процесін жақсартуға арналған техника

Сағыз станциясынан бастап Д.Нұрпейісоваға дейінгі жол телімі Атырау жол дистанциясына қарайды. Осы учаскеде үздіксіз жол қозғалысын қамтамасыз ету – жолшылардың күнделікті тірлігі. Дистанцияда жұмысшылардың жағдайын, еңбек процесін жақсартуға арналған бірнеше техника сатып алынды.

Мәселен, жұмысшыларды тасуға арналған жол талғамайтын вахта Камазы, өзі жүк түсіретін самосвал көлігі, дизелді отын көмегімен жүретін АС-5 теміржол көлігі, тамақ ішу, жатын бөлмесі бар техникалар бар. Бұл техникалар жұмысшылардың жұмысын жеңілдетіп, жақсартып отыр. Сондай техниканың бірі – Автоматриса темір жол көлігі.  

– Бұл – демалатын 10 адамдық орны, кондиционер, ас бөлмесі, жуынып-шайынатын душы, электр тоғы, теледидар, тоңазытқыш, автономды жылытқышы бар жайлы кешенді модуль. Күніне бригада құрамы 10-15 адаммен жолдың жай-күйін анықтап, жөндеуге шығады. Жол параметрлерінің талапқа сәйкестілігі, шпал, рельстер жайы қаралып, кей тұстарда ауыстырылады. Менің міндетім бригаданы діттеген жеріне жеткізу, – дейді машинист Жеткіншек Бекбауов.  

Өзі әу баста дистанцияда жолшы болып жұмыс істеген. Содан кейін Қарағанды, Ақтөбе қалаларында оқып, арнайы жол техникасын жүргізуші куәлігін алыпты. МПТ кран, қар тазалаушы техниканы да тізгіндеген. Бүгінде осы модульді техниканы жүргізеді. 30 жылдан бері бір мекемеде еңбек етіп келеді. Қасында жас маман, машинист көмекшісі Ақылжан Ерсайыновты техника тілін жетік меңгеруге баулуда.