Қызылорда темір жолын жылумен қамту штаттық режимде жүріп жатыр

Қызылорда темір жолында қыс маусымына дайындық шаралары қатарында ең алдымен ғимараттарды жылумен қамтамасыз ететін 8 қазандыққа және 1621 метр жылу жүйелеріне күтім жасалып, қысымды тазалықтан өткізілді.

Екінші кезекте қажетті техникалық және тұрмыстық көмір жеткізу кестеге сай орындалды және оны тұйықтарға жеткізу мен тарату қатаң бақылауда.  

– «Теміржолсу-Қызылорда» ЖШС теміржол көлігі кәсіпорындарына қарасты заңды және жеке тұлғаларды қажетті көлемде жылумен қамтамасыз ету міндетін өз деңгейінде атқарып отыр. Серіктестіктің теңгерімінде тұтынушыларды жылумен қамтамасыз ететін сегіз қазандық бар. Олардың ішінде Төретам, Жосалы, Жалағаш станцияларында орналасқан қазандықтар көмір жақса, Тереңөзек, Белкөл, Шиелі және Жаңақорған станцияларында орналасқан қазандықтар көгілдір отынға көшірілген, – дейді «Теміржолсу-Қызылорда» серіктестігінің бас инженері Насыр Абдулла.  

Мекеме 2022-2023 жылдардағы жылыту маусымына отыз үш тұтынушыға жылу жеткізуге келісімшарт жасасқан. Сол үшін жаз айларында 1621 метр жылу желілеріне ағымдағы жөндеу жұмыстарын жасап, жүйені толықтай жуып-шаю мен гидравликалық сынақтардан өткізді. Барлық от жағушы машинистер арнайы киімдермен және зиянды жұмыстар үшін берілетін сүтпен қамтамасыз етілген. Сонымен қатар олар арнайы оқу бағдарламалары бойынша оқудан өткен.  

Көмір жағатын қазандықтар үшін биылғы маусымға қажетті 719 тонна қатты отынның қазіргі уақытта 417 тоннасы мекеме қоймаларына түсірілсе, 140 тонна тапсырыс орындаушылар тарапынан жөнелтіліп, қажетті көмірмен қамтуда кедергі болмайды. Ал көгілдір отын жағатын 4 станциядағы қазандықтар техникалық тексеру, жөндеу жұмысынан өткізіліп, жылуды тұрақты таратып тұр. Жалпы аймақ бойынша жылумен қамтамасыз ету жұмыстары штаттық режимде жұмыс жасауда.