Ганюшкино станциясында электрондық құжат айналымы артты

Ганюшкино станциясы – Ресей мен Қазақстанды байланыстыратын үлкен станция. Құрманғазы ауданының орталығынан 25 шақырым жерде орналасқан. Сол жердегі бұрын станция аттас ауыл бүгінде Ақкөл аталады.

Бірақ ежелден Ганюшкино болып танылған станция атауы өзгеріссіз. Жүйелі жол торабы, жүк тиеп-түсіруге арналған қосалқы тұйықтары мен кірме жолдары бар, инфрақұрылымы қалыптасқан іргелі станцияда барлық салалық құрылымдар қызмет атқарады. Станциядан бөлек жол дистанциясы, вагон және локомотив, байланыс, электрмен қамту, күзет, барлығы теміржол қызметін көрсететін он екі мекеме бір жағадан бас, бір жеңнен қол шығарып дегендей қоян-қолтық еңбек етуде.  

Солардың бәрінің жұмысын үйлестіріп отырған әрине станция. Ай сайын орташа есеппен Ресей бағытына 273 жүк пойызы, 18363 вагон жүк тапсырылып, кері қарай 268 жүк пойызы, 3877 жүк тиелген вагон қабылданады. Станцияда 12 жол бар. Жұп паркте сегіз жол болса, тақ паркте төртеу. Соның ішінде ең ұзыны 1735 метрді құрайды. Ал станция жолдарының мұндай ұзын болуы маневрлік жұмыстар жасауға өте қолайлы, сондықтан мұнда пойыздардың тұрып қалуы сирек.  

Ағымдағы жылдың он бір айлық көрсеткіші бойынша 2669 пойыз, 202942 вагон қабылданып, 2689 пойыз, 192419 вагон тапсырылды. Сонымен қатар 101 вагон жүк тиеліп, 4690 вагон жүктер түсіріліп, жоспар бойынша қосымша кіріс жиынтығы 31992711,00 теңгені құрады. Жүк тиеп-түсіру бойынша жоспар 100 пайыз орындалып келеді. Станция қазіргі күні жүк тиеп-түсіру бойынша жаңа жүйеге көшті, құжаттар АСУ ДКР жүйесіне сәйкес электронды түрде рәсімделеді. Соңғы кезде тек ғаламтор арқылы байланысып, электрондық құжат ресімдейтін виртуалды клиенттер қатары артқан. Бүгінгі күні 42 тұрақты клиент станциямен виртуалды қарым-қатынас орнатқан. Оларға станция басына келіп, кезек күтіп құжат рәсімдеу тіпті де маңызды емес. Электронды түрде рәсімделген құжат саны 726-ға жетті, – дейді станция бастығы Теңел Исмағұлов.  

Станция басында, яғни Ақкөлде 5 мыңға жуық адам тұрады. Ауыл тұрғындарының басым көпшілігін жұмыспен қамтып отырған – темір жолдың құрылымдық бөлімшелері. Бір ғана станцияның өзінде 152 адам еңбек етеді. Олар пойыз құрастырушылар, станция кезекшілері, жүк кассирлері, тасымалдау құжаттарын өңдеу операторлары, жүк-багаж қабылдаушы, белгі беруші, АСУ операторы, транзиттік агент, т.б. Атырау – Дина, Атырау – Ганюшкино, Ташкент – Волгоград, Худжант – Саратов бағытына қатынайтын жолаушы пойыздары станция арқылы өтеді. Жергілікті халықтың қажетін өтеуге толығымен жетіп тұр.