Тараз вокзалының аумағы қардан тазартылды
Тараз қаласы бойынша меншікті тілші
Жамбыл облысына 9-11 қаңтар аралығында қар қалың жауды. Жергілікті теміржолшылардың ұйымдасқан іс-әрекетінің арқасында жолдар тазарып, келген-кеткен жолаушы халыққа да жағдай жасалды.
Үш күнде вокзал бастығының үш көмекшісі кезекшілікке шығып, облыс орталығына келген жолаушылар вокзал перронында тайып құлап келеңсіз жайтқа ұшырамас үшін жауған қарды күн сайын тазалап отырды. Қар тазалау жұмысы үзіліссіз жүргізілгенінің нәтижесінде бірде-бір төтенше жағдай орын алған жоқ.
– Вокзалда жолаушылар пойыздарға екі жолдан мінеді. Сондықтан алты жұмысшыны ауысымдық тәсілмен кезекшілікке қойып, перрон күндіз-түні қардан тазаланып тұрды. Әсіресе 10 қаңтар күні қар қалың түсті. Қала әкімдігінің салаға жауапты мамандары қандай көмек керек деп хабарласты. Дегенмен, әзірге өз күшімізбен жүргізіп жатқанымызды айтып, алдағы уақытта көмек керек болса хабарласатынымызды айттық, – дейді Тараз вокзалының бастығы Дидар Мүсіретәлиев.