Елдің оңтүстігіне көмір кедергісіз жеткізіліп жатыр
Түркістан облысы бойынша меншікті тілші
Оңтүстікте биылғы жылдың алғашқы айында қар қалың түсіп, ауа райы – 22 градусқа дейін күрт суытты. Түркістан облысында мыңдаған үйді көмірмен жылытудан бөлек, жүздеген тонна көмірді қажет ететін жеке шаруашылықтар мен жылыжайлар аз емес.
Теміржолшылар қысқа дайындықты жазда бастап, көмір тасымалын бүгінде жыл он екі ай жүргізе беретін болған. Солай бола тұра облыстағы көптеген жеке шаруашылықтар мен кейбір мекемелер арқаны кеңге салып, тиісті көмір қорын қалыптастырмаған болып шықты. Жыл басынан бергі 23 күн ішінде тек Сарыағаш станциясына 274 вагонмен 18 906 тонна жеткізілген. Бұған дейін де станцияға 840 вагонмен 57 940 тонна көмір жеткізілген екен.
Арыс қаласындағы көмір тарату пунктінде де жұмыс қыза түскен. Қазіргі кезде тәулігіне 7-10 вагон көмір жеткізілгенімен, күннің суықтығына орай вагондарды босатуда біршама қиындық туындаған. Қала әкімдігі мен құқық қорғау органдары тарапынан көмір базасының маңында кептеліс пен жанжал тумас үшін арнайы кезекшілік ұйымдастырылған. Алыпсатарлықтың белең алуына жол бермес үшін әрбір жүк көлігіне 2,5-3 тоннадан артық көмір тиелмейді. Ал көмір бағасы да бұрынғы қалпында – 16 мың теңгеден саудалануда.