Қазалыдағы станция жолдарына санитарлық тазалық жүргізілді
Қызылорда облысы бойынша меншікті тілші
Қазалы вагон пайдалану депосының ұжымы станция жолдары мен магистраль жолағына санитарлық тазалық жұмыстарын жүргізді.
Теміржол торабындағы сенбілік депо басшылығы мен кәсіподақ ұйымы белсенділерінің ұйымдастыруымен қолға алынып, оған ауысымаралық және жұмыстан тыс теміржолшылар жұмылдырылды. Қазалы үлкен тораптық станция болғандықтан аймақтан өтетін барлық жолаушы пойызы аялдап өтеді. Яғни мұндағы жолаушылар нөпірі өзге бекеттерге қарағанда басым, сондықтан бекеттің тазалығын қажетті деңгейде ұстап тұру оңай емес.
Қазалы вагон пайдалану депосының бастығы Арғын Орымбаевтың айтуынша, станция жолдарын жиі тазалап тұрмаса болмайды. Сырдың тәулік бойы тынбай ұйытқи соғатын желі жол бойын қоқысқа толтырып тастайтын көрінеді. Оған әрі-бері өткен жолаушы пойызының жолаушылары да «үлестерін» қосып, терезеден қалдық салынған пакеттерді лақтырып кетеді екен. Ол сосын желмен жан-жаққа тарайды деген сөз. Станция басы қоқыс алаңына айналмас үшін жергілікті теміржолшылар қыстың қақаған суығына қарамастан сенбілік ұйымдастырып, тазалық жұмыстарын жүргізуге мәжбүр.