Түрлі-түсті жұма...

Әр мекемеде жұмысқа келгенде киіну тәртібі бар. Мұны «дресс код» дейді. Әсіресе мемлекеттік мекемелерде оны қатаң сақтау талап етіледі.

Ал теміржолда арнайы форма киетін қызметкерлерден бөлек былайғы жұрт әдетте ақ-қара немесе сұр стандарт түсті сақтауға тырысады. Алайда, көптеген мекемелерде бес күн жұмыстың бір күнінде, әдетте жұма күні еркін киінуге рұқсат беріледі. Мұндай мүмкіндік теміржолшылар арасында да бар. Атырау магистральдық желі бөлімшесінің ұжымы да осы еркін киінуді жұмаға белгілеп, сол күні жұмысқа барлығы бір түсті киім киіп келуге ұйғарысыпты. Бұл күнді олар «Түрлі түсті жұма» деп атайды екен. Былай қарағанда, онда тұрған ештеңе жоқ сияқты. Бірақ олай емес екен. 

«Біз аптаның соңғы жұма күнінде бүкіл ұжым боп жұмысқа бір түсті киініп келуге шешім қабылдадық. Әрине, бастапқыда оны әркім әр түрлі қабылдады, дегенмен уақыт өте келе бұл өте қызық, нағыз мотивация екеніне көз жеткіздік, ұжымның бірлігі мен белсенділігін, адамдардың ынтымақтастығын нығайтады», – дейді кадр бөлімінің басшысы Анар Жалғасбаева.  

Айтса айтқандай, нәтижесі керемет болыпты. Бір түсті киім кию ұжымдық иммунитет пен көңіл күйді көтеріп, адамдардың бір-біріне деген құрметі мен сыйластығы арта түскен. Тіпті талапқа сай болып, қатардан қалмау үшін қызметкерлер белгілеген түстегі киімді табуға барын салады екен. Демалыс күндері біреуі базар араласа, біреулер сандығын ашып, гардеробын ақтарып дегендей. Ұзын сөздің қысқасы, әр жұма сайын ақ деген күні ақ, көк деген аптада көк, жасыл дегенде жасыл, күлгін десе күлгін түспен киініп келу үрдісі қалыптасыпты.