Дистанция жұмысшылары сынақтан өтіп жатыр
Қызылорда облысы бойынша меншікті тілші
Қызылорда жол дистанциясында жұмысшылардың өз кәсібіне сәйкестігін анықтау мақсатында сынақ басталды. Шиелі, Қаракеткен және Жалағаш станцияларында өткен сынақ қорытындысы жолшылардың білім деңгейін байқатты.
Қызылорда жол дистанциясының өндірістік оқыту шебері Ербол Сәрсенбаев, техникалық қауіпсіздік және еңбек қорғау инженері Майра Бадрақова мен кәсіподақ ұйымының төрайымы Ғалия Ноғайбаевадан құралған жұмыс тобы телімдерді аралап, жұмысшыларды сынақтан өткізуге қатысуда. Емтиханның басты сұрақтары теміржолшының жеке бас қауіпсіздігі мен жылжымалы құрамдардың қауіпсіздігін сақтауға әзірлігін анықтау, қозғалыс қауіпсіздігі, еңбек қорғау, теориялық және ситуациялық сауалдарды меңгеріп, дұрыс шешім қабылдауын анықтау, дистанция жұмысшыларына қатысты телеграфтық нұсқамалар мен нормативтік құжаттар, т.т. сарапталып, таңдалып алыныпты.
– Жыл сайынғы өтетін жұмысшылардың білім деңгейін тексеру емтиханы биыл Шиелі, Қаракеткен және Жалағаш станцияларында басталды. Сынақ электр қауіпсіздігі мен еңбек қорғау тақырыбында өткізіліп, 49 жол жөндеуші сынақ тапсырып, кәсіби мамандыққа сай екендіктерін дәлелдей білді. Емтиханға дейінгі мерзімде жолшыларға дайындық, пысықтау сабақтары өткізіліп сабақтардың қаншалықты деңгейде меңгерілгені сарапталады. Емтихан алдағы күндері басқа станцияларда жалғасады, – дейді техникалық қауіпсіздік және еңбек қорғау инженері Майра Бадрақова.
Сынақ кезінде дистанция кәсіподақ ұйымының төрайымы Ғалия Ноғайбаева жолшыларға түсінікті, нақты сауалдар қойылуын қадағалаумен қатар жолшылардың да емтихан қабылдаушылар алдында асып-саспай, өз ойын дұрыс жеткізе білуіне қолайлы жағдай жасады.