Таразда теміржол үстінен өтетін екі көпір салынады
Тараз қаласы бойынша меншікті тілші
Таразда теміржол үстінен өтетін көпір салу мәселесі көтерілуде. Ол облыс орталығындағы ең ұзын, магистральдық көше – Абай даңғылымен темір жолдың үстінен өтетін аспалы көпір болмақ.
Соңғы отыз жылда Тараз халқының саны 365-тен 427 мыңнан асқан. Темір жолдың арғы бетіндегі халық саны 25 мыңнан 50 мыңға жеткен. Тараз вокзалының өзі бүгінде қала орталығында қалып барады. Көлік саны да еселеп артқан.
– Қаланың екі жағын байланыстырып тұрған темір жол астындағы өткелден өтетін көліктердің тәуліктік сыйымдылығы – 15 мың. Ал қазір мұнда тәулігіне 27 мың көлік өтеді. Үлкен кептеліс болады. Сондықтан облыс әкімінің осы аумақтан аспалы көпір салу жобасы теміржолшылар тарапынан қолдау тауып отыр, – дейді Жамбыл бөлімшесінің бас инженері Дүйсен Сыдықов.
Жобаның құны – 8 миллиард теңге, көпір салынатын болса, темір жолдың екі бетіне халық еркін қатынайтын болады.
Екінші мәселе, осы даңғылдың шығысындағы Жамбыл-Қаратау телімінің бесінші шақырымындағы «Ауыл-Береке» базарының аумағы. Мұнда тәулігіне 4-5 пойыз жүргенімен қауіп жоғары. Көлік кептелісі, жүргіншілер шоғыры қалың. Қала берді «Ауыл-Береке» базары, одан әрі автобекет. Ал автобекеттің шығысында бос жатқан алқапта жаңа «Әулиеата» шағын ауданы бой көтермек. Бүгінгі күні инфрақұрылым тартылып, тіпті «ІТ мектеп» пен облыстық онкологиялық аурухана салынуда. Сондықтан қаланың бас жоспарын қайта қараған жергілікті билік екінші «Әулиеата» шағын ауданына баратын жолды кесіп өтетін темір жолдың үстінен 1,5 км аспалы көпірдің құрылысын қаржыландырады деген болжам айтылуда. Демек болашақта екі көпір салынады деген сөз.