Теміржолшылар тазалық жұмыстарын бастап кетті

Арғын Орымбаев басқаратын Қазалы вагон пайдалану депосының теміржолшылары санитарлық тазалық жұмыстарын жүргізіп, сенбілік өткізді. 

«Тазалық – табалдырықтан басталады» деп білетін қазалылықтар теміржол торабындағы сенбілікті депо басшысы мен ұжымның кәсіподақ ұйымының төрағасы Бақытжан Балтабайұлының бастамасымен, кәсіподақ ұйымы белсенділерінің ұйымдастыруымен қолға алды. Оған ауысымаралық және жұмыстан тыс теміржолшылар жұмылдырылды. Қашанда аймақтағы игі бастама, жағымды жаңалықтың бастамашысы болып жүретін Қазалы депосының теміржолшылары аймақта басталған көктемгі тазалық жұмысы –  енбілікті бірінші болып өткізіп, өзге әріптестеріне үлгі бола білді.

Депо бойынша өткізілген сенбілік бірінші кезекте жұмыс орнын ретке келтіру жұмысынан бастау алып, депо ауласына ауысқан. Одан кейін жылжымалы құрамдарға техникалық қызмет көрсететін барлық бекеттерде сенбілік жұмысы жалғасын тауып, теміржолшылардың техқызмет жасайтын орындарының түгелін ретке келітіруге күш жұмсалған екен. Әрине бір күнгі сенбілікте сонша аумақты ретке келтіруге үлгермесі анық. Дегенмен, тазалықты жүргізу емес, оны бірқалыпты ұстап тұру тұрғысынан жұмыс басталып, жүргізіліп жатыр. Ол үшін барлық бекеттердегі депоның ауласына түрлі көлемдегі қоқыс жәшіктері ретке келітіріліп, жоқ жеріне жаңадан орналастырылып, ағаш-талдардың қураған бұтақтары балақталып кесіліп, түптері қопсытылып, әкпен заласыздандырылуда. Арықтар тазартылып, қоқыстар сыртқа шығарылып бекеттердегі магистральдық желілер бойына да тазалық жұмыстары жүргізілген. Магистральдық желілер бойын қағаз, пакет секілді экологиялық тазалықты бұзатын қоқыстардан тазарту жұмыстары жалғасып жатыр.

– Қазалы вагон пайдалану депосының техникалық қызмет көрсету бекеттері және бақылау қосындарының жұмысшылары теміржол магистральды жолағына, өткелдеріне санитарлық тазалық жұмыстарын жүргізіп сенбілік жасады. Сенбіліктің қоғам назарын тазалық сақтауға аударып, экологиялық мәдениетті қалыптастыруда маңызы зор. «Тазалық бар жерде-береке бар» демекші тазалық жұмыстары депо жұмысшылары тарапынан барлық бекеттердегі қосындарда жалғасын табады. Ендігі кезекте депо маңын жасыл желекке айналдыру үшін көшет отырғызу жұмыстары қолға алынады, – деді ұжым бастығы, құрметті теміржолшы Арғын Орымбаев.