Ұлыс күні ұлықталды

Сыр бойына көктемді ала келген Наурыз мерекесін Қызылорда магистральдық желі бөлімшесіне қарасты Қызылорда белгі беру және байланыс дистанциясы, Қызылорда жол дистанциясы мен Қызылорда станциясының теміржолшылары ерекше форматта атап өтті.  

Ұлыстың ұлы күніне әзірленген мерекелік шара кезінде әріптестерінің қуанышын бөлісу үшін Қызылорда қосалқы бөлімінің бастығы Батырхан Базарбаев, Магистральдық желі бөлімшесінің директоры Ибраким Басықараев, Қауіпсіздік департаментінің Қызылорда учаскесі бас ревизоры Алмат Молдашев, Ардагерлер кеңесінің төрағасы Сисенбі Шермаханов және «Қазкөліккәсіп»ҚБ Қызылорда филиалының төрағасы Бауыржан Ахметовтер аталған мекемелерді аралап, құттықтап шықты.  

Қызылорда белгі беру және байланыс дистанциясы басшылығы мен кәсіподақ ұйымының төрайымы Ғалия Қожахметовалардың өндірістік цехта ұйымдастырған мерекеге дистанцияның есептегі зейнеткерлері шақырылып, құрмет көрсетілді. Алты қанатты ақ орданың кіре берісіне ұлттық киім киіп келушілерді ізетпен күтіп алған дистанциялықтар мерекені ерекше форматта өткізді. Жеті түрлі дән қосылып әзірленген Наурыз көжеден ауыз тиген дистанциялықтар, бір-біріне құттықтау лебіздерін айтып, жаңа күннен жаңалық күтумен бірге ортақ мәселе қозғалыс қауіпсіздігінің сақталуын тілге тиек етті.  

– Дистанцияның басшылық құрамы өз ізбасарларынан құрама команда даярлап ұлттық спорт түрлерінен сайысқа түсті. Арасында әр құрамаға өз өнерлерін көрсетуге мүмкіндік берілді. Арқан тарту, қол күресі, кір тасын көтеру және ләңгі тебуден жарыс ұйымдастырылып, үздіктерге бағалы сыйлықтар берілді. Барлық жаңалықтың жаршысы наурыз мерекесінде әріптестеріміздің тұнық ой, жаңа күш, соны серпінмен жұмысқа құлшынысын арттыру үшін наурыз дастарханына жиналдық. Бір-бірімізді көріп қуанышымызбен бөлістік. Достық сайысында күш сынасқан әріптестер күн мен түннің теңесер тұсында өткізілген ұлттық мерекеде барлық ұпайды жинақтап өзара ымыраласқан дистанциялықтар достық атты қымбат ұғымды жеңіс тұғырына шығарды, – деді кәсіподақ ұйымының төрайымы Ғалия Қожахметова.

Бөлімшенің басшылық құрамының келесі аялдамасы Қызылорда станциясы болды. Мұнда станция басшысы Қайрат Төрединовтың басшылығымен станцияның зейнеткерлері мен ұжымдастарына наурыз көже әзірленіп, мерекелік дастархан жайылыпты. Мұнда да әріптестерін Наурыз мерекесімен құттықтаған басшылық құрам биылғы жылды қозғалыс қауіпсіздігі талаптарын қатаң сақтап тосын жағдайсыз өткізуге шақырды.

Станциялықтар өткізген Наурыз тойының, екі дистанциядағыдан еркешелігі мұнда, станция кезекшілері ағайынды Құрманғазиев Рүстем мен Дастанның аға мен іні болып айтыс ұйымдастыруы болды. Кәнігі аузы алты қарыс ақындардай жыр маржанын төккен қос ақынның өнеріне әріптестері тәнті болып,  қол соғып ризашылықтарын білдірді.

Мұнан кейін Марат Оңалов басқаратын Қызылорда жол дистанциясының ауласына келіп Компанияның қауіпсіздік департаменті Қызылорда учаскесінің бас ревизоры Алмат Молдашевтың көшет отырғызу сәтіне куә болдық.  

Бұған дейін аймақтың теміржолшылары тарапынан тігілген көшеттер бой түзеп, аллеяға айналғалы әдемі өсіп келеді екен. Бұл да бір жақсы дәстүр екенін түйсінген теміржолшылар шатырларда жайылған наурыз көжеден дәм татты. Жолшылардың дастарханына шақырылған зейнеткерлердің игі тілегін тыңдап, өнегелі сөзінен сусындаған дистанциялықтар олардың батасына алды. Мереке барысында дистанцияның өркендеуіне сүбелі үлес қосып жүрген озаттар марапатталды.

– Наурыз мерекесіне орай үздік жолшыларға дистанция басшылығы мен кәсіподақ ұйымы төрайымының құрмет грамотасы мен алғыс хаты 25 теміржолшыға табысталды. Техникамен жұмыс жасайтын жолшылардың бірде болмаса, бірде кемшілікке жол беріп қойып басшылық тарапынан жазаға тартылатын белгілі. Бүгінгі мерекеге орай ол жазаның түгелі алынып тасталды. Арнайы шақырылған мәдениет ошақтары қызметкерлерінің ән-күйі мерекені айшықтап жолшылар қауымына көтеріңкі көңіл-күй сыйлады. Өнер өкілдерінен қалыспай өздерін жаңа қырынан таныта білген дистанция теміржолшылары да әріптестерінің көзайымына айналып, құрметке бөленді, – деді дистанцияның кәсіподақ ұйымының төрайымы Ғалия Ноғайбаева.

Наурыз мерекесінде ұйымдастырылған ұлттық ойындар қорытындысында арқан тарту сайысында дистанцияның техникалық бөлімі 1-орын, ПчУ 2-орын алса транспорт бөлімі жүлделі үшінші орынды иеленіп сыйлыққа ие болды. Қол күресінен Елжан Ноғайбаев, Абай Асанхан Спанов, Нұрсұлтан Қарақұловтар құрметке бөленді. Кір тасын көтеру жарысында да жолшылардың осал еместігі байқалды. Сонымен қатар дистанция бастығының атынан тігілген бір қап сыр күрішін ардагер теміржолшылар қанжығасына байлап жастарға үлгі көрсете білді.

Мерекелік дастарханға жиналған теміржолшылар бір-бірін ұлыстың ұлы күнімен шын жүректен құттықтады. Теміржол саласының даму мен өсіп-өркендеуіне қосқан ерекше үлестері үшін бір-біріне алғыс білдірді.