Маңғыстауда күнде думан, күнде той
Маңғыстау облысы бойынша меншікті тілші
Көрісу күнінен бері Маңғыстауда күнде думан, күнде той. Ұжымдар мерекелік дастархан жайып, бір-бірін қонаққа шақырып, халқымыздың дархан пейілі мен ауызбіршілік үлгісін көрсетуде. Өткен аптада да бірнеше теміржол мекемесінде Ұлыстың ұлы күніне орай ұлттық дәстүрлер ұлықталған нағыз өз нақышындағы Наурыз мерекесі ұйымдастырылды.
Маңғыстау қосалқы бөліміне қарасты вагон пайдалану депосы мен Маңғыстау магистральдық желі бөлімшесінің байланыс және белгі беру дистанциясының ауласына ақ шаңқан киіз үйлер тігілді. Қос ұжымда дүркіреген думанды той өтті. Деподағы Наурыз салтанатына ұжым ардагерлері де келіп, ақ тілегін айтып, кештің қадірлі қонағы болды. Наурыз көже құйылып, қазы-қарта мен құрт-ірімшік сияқты дәруменді ас-тағамдарымыз толған берекелі дастархан басында мерекелі кеш болды. Білекті теміржолшылар қол күрестіріп, гір тасын көтерді. Епті жігіттер ләңгі теуіп, бірлесе арқан тартысып, спорттық ойындардан күш сынасты.
– Мерекені жоғары деңгейде, көтеріңкі көңіл-күймен атап өтуге жұмысшылардың барлығы атсалысты. Бірі көрініс қойса, басқасы билеп, ән айтып, тамақ пісіріп, қызмет етті. Сайыстарға да зор қызығушылықпен қатысты. Спорттық ойындардың үздіктеріне кәсіподақ ұйымының қаржылай қолдауымен диплом, бағалы сыйлықтар табысталды, – дейді Маңғыстау вагон депосы кәсіподақ ұйымының төрағасы Әділет Байсеитов.
Дистанция ауласында бой көтерген қазақтың қара шаңырағында да ұлттық тағамдар ортаға қойылып, салт-дәстүр көріністерінен қойылымдар болды. Келіншектер бешпент-камзолын киіп, ақ орамалы мен сәнді әшекейлерін тағып, қазақ келіндерінің киім үлгісінен жарысқа түсті. Бірінші орынды лездеме байланыс вагон жолсерігі Баян Қосаманова, екінші және үшінші орындарды Өзен байланыс электромеханиктері Гүлпері Қадырова, Болған Төреғалиева алды. Жасы үлкен апалар бөбекті бесікке салу дәстүрін көрсетіп, баланың тұсауын кесті. Ер азаматтар жағы спорттық ойындардан бақ сынасты. Қол күресті, гір көтерді, ләңгі теуіп, арқан тартты. Ләңгіні жерге түсірмей тебуде зейнеттегі теміржолшы Ялит Кемелхан алдына жан салмай, жеңімпаз атанды. Қол күресінен автокөлік және механикаландыру бригадасының ССПС жүргізушісі Талғат Демеген мықты шықты. Жұртты шаңына ілестірмей, 24 келі гір тасын қаңбақша көтеріп ойнатқан автокөлік және механикаландыру бригадасының дәнекершісі Жетпісбай Колбаев болса, оның бригадасы арқан тартысуда бәрінен үстем шықты. Жеңімпаздар кәсіподақ ұйымы тарапынан марапаттарға ие болды.