Теміржолшы һәм саятшы

«Ақтөбе-Маңғыстау» пойызының бастығы Әліби Танимов – көшпелі елдің ажырамас ұлттық кәсібі аңшылық өнерді ұстанған жан. Бала кезден әуес саятшылық өнеріне бүкіл бос уақытын арнайды.

38 жастағы жігіт ағасы 20 жылдан бері аңшылықпен кәсіби түрде айналысады. Қанжығасында жыртқыш аңның барлық түрі бар. Қаз бен үйректен бөлек, қасқыр, түлкі, қоян, жабайы қабанға дейін ұстаған. Бос уақытында тазы жүгіртіп, ат баптайды.  

«Біз заңды түрде аңшылық етеміз. Құжатым да, қаруым да бар, бірақ аңды қорлауға болмайды, киесі бар деген ұстанымдамын. Бұл – хобби. Тек маусым кезінде аң аулауға шығамыз», – дейді сері-теміржолшы.  

Бүгінде мылтық асынып, тазы жүгіртіп, құс салатын аңшылық һәм саятшылық кәсібі қайта дамуда. Ата жолын жалғастырып келе жатқан серілерді әр жерден кездестіруге болады.

«Аңға шығатын тазы бөлек болады. Мінезді, қырағы келеді. Кез келген тазы жыртқыш аңды ала алмайды. Олардың да өз тактикасы бар. Аңға шығардың алдында бір күн бұрын тамақ бермей, тазыларды дайындаймыз. Дәрумендерін алдын ала беріп қоясың. Ал астыңдағы атың қайратты болу керек», – дейді Әліби.  

Теміржолшы жігіт үшін спорттың бұл түрі нағыз демалыс. Айтуынша, аң аулауды кәсіп еткен адам табиғатты да аялауға тиіс.  

«Құстың жұмыртқалайтын уақытында аңшылық жасалмайды. Көктемде құстың еркегін ғана атуға рұқсат. Әр аңды аулайтын уақыт бар. Буаз кезінде атуға болмайды», – дейді.  

Қазақстан – саятшылықты спортқа кіргізген алғашқы ел. Саятшылық өнер табиғаттағы тепе-теңдікті бұзбай, ұлы үйлесімге кесірін тигізбейтіндей етіп, жүргізілуге тиіс.