Наурыз – көктем мейрамы

Қызылорда облысы орталығындағы орталық алаңға қараша үй тігіп Наурыз тойын тойлаған іргелі мекемелердің арасында қызылордалық теміржолшылардың он алты қанат ордасы ерекше көрінеді екен. Бұл теміржолшылардың да мерейін өсіріп, абыройын асқақтатып тұрғандай. Облыс әкімінің жұмыс тобы алаңды жаңалай тігілген қараша үйлерге бас сұғып дәмнен ауыз тиіп, мерекемен құттықтады, алғыс білдірді.

Көпшілікке арналған наурыз көженің дер уақытында әзір болуын ойластырған Қызылорда магистральдық желі бөлімшесінің директоры, Қызылорда қалалық мәслихатының депутаты Ибраким Басықараев, бас инженер Күлхан Белкібаев, «Қазкөліккәсіп»ҚБ филиалының төрағасы Бауыржан Ахметов, Қызылорда қосалық бөлімінің кәсіподақ ұйымының төрағасы Мұхтар Көпірбаев әріптестерімен бірге келген қонақтарды қарсы алды. Құрмет көрсетті, көпшіліктің алғысына бөленді.

– Барша түркі халықтарына тән көктем мерекесі әрі жыл басы саналатын Наурыз көпшілікпен бірге тойлайтын той секілді кеңінен аталып өтіледі. Ертеден қалыптасып бізге жеткен дәстүр бойынша орталық алаңда кәсіподақ ұйымдарының ұйымдастыруымен теміржолшылар атынан киіз үй тігіліп, келушілерге наурыз көже таратылып көпшіліктің алғысын бөлендік, қонақжайлылық танытып, елдің батасын алдық, – деді Қызылорда магистральдық желі бөлімшесінің директоры, Қызылорда қалалық мәслихатының депутаты Ибраким Басықараев.

Бір-біріне игі тілектерін арнаған теміржолшылар мереке қарсаңында көп айтатын «Ұлыстың ұлы күні құтты болсын!», «Ақ мол болсын!», «Көңілде кір қалмасын», «Әз Наурыз құт-береке әкелсін» сипатындағы орталық алаңда айтылған көпшіліктің бата-тілегіне бөленді. Өздерінің  тараптарынан пойыздардың қозғалыс қауіпсіздігі бұзылмауын, жылды тосын жағдайсыз өткізуге, кемшіліктерді барынша азайтуға жұмыс жасауға күш салатындықтары аңғарылды. Яғни, алаңда айтылған көпшілік батасының мақбұл болатындығына мән беріліп бұл игіліктің салалық кәсіпте де жаңғырып, аймақ теміржолының өркендеуіне бір атаның баласындай бірлесіп жұмыс жасамақшы.