Қытайлық делегация Ақтау портында болды
Маңғыстау облысы бойынша меншікті тілші
Ақтау теңіз портына Қытайдың Ляньюньган қаласынан арнайы делегация келді.
«Ақтау теңіз порты» АЭА аумағында «Ақтау қаласындағы Еуразиялық жеткізу тізбегі базасының» құрылысын іске қосу іс-шарасы қарсаңында келген қонақтар портты қаланың мүмкіндіктерімен танысты.
Ресми делегацияны «АТСП» ҰК» АҚ Басқарма төрағасы Абай Түрікпенбаев қарсы алып, порттың инфрақұрылымымен танысу барысында қонақтарға теңіз айлағының ағымдағы және болашақтағы мүмкіндіктері туралы хабардар етті.
Ақтау портының қуаттылығы АЭА аумағында шығыстағы әріптестер іске асыратын құрастыру және қайта өңдеу өндірістерін құру мүмкіндігі бар кедендік логистикалық қойма салуды көздейтін жобаның толық ауқымды жұмыс істеуі үшін сөзсіз талап етілетін болады.
Инвесторлар атап өткендей, жоба Транскаспий халықаралық көлік бағыты бойындағы сауданы дамыту мүддесі үшін логистикалық инфрақұрылым мен қызметтердің сапасын арттыруға мүмкіндік береді. Ал салада білікті кадрларды қалыптастыру үшін жоба шеңберінде жергілікті кәсіптік-техникалық оқу орындарымен серіктестікте кәсіптік оқыту бағдарламасы дайындалып, енгізілетін болады. Кем дегенде 120 жас маман логистикалық және жеңіл өнеркәсіпте жұмыс істеу үшін қажетті негізгі білім мен дағдыларды алады.