Көктемгі тексерісте теміржолшылардың әлеуметтік ахуалы да қаралады
Абай облысы бойынша меншікті тілші
Семей ЖТ бөлімшесінде көктемгі комиссиялық тексеру жұмыстары қарқынды жүріп жатыр. Сәуір айының 17-нен басталған шара алдағы мамыр айының 5-ші жұлдызына дейін жалғасады.
Осы жылы байқау шалғайдағы Ақтоғай – Аягөз телімінен басталды. Дүйсенбі күні бөлімше басшысы Владимир Бабиченко мен НЖС-6 басшысы Айдын Шәукежановтар бастаған комиссиялық топ Жүзағаш станциясына табан тіреді. Биылғы ерекшелік комиссия құрамына кадр және кәсіподақ ұйымының жетекшілері де тартылып отыр. Яғни, желі бойындағы теміржолшылардың әлеуметтік ахуалы да жан-жақты сарапқа түсуде.
Комиссия мүшелері әсіресе екінші және үшінші класты станцияларда ұзағырақ аялдады. Шалғайдағы қызметкерлердің нормативтік құжаттамалармен жұмысы, станциялар басшыларының қызметтік журналды толтыру, жоспарлы шараларды орындау барысындағы жұмыстары қатаң тексерілді.
Ақтоғай-Аягөз телімін толық сүзіп шыққан комиссия мүшелері Аягөз станциясында тораптық кеңес өткізді. Онда Қозғалыс қауіпсіздігі департаментінің Семей аймағы бойынша бас ревизоры Темірбек Ақшалов баяндама жасады. Қысқы жұмыстардың қорытындысы жасалып, әр мекеменің қызметі бағаланып, жазғы маусымдағы межелі шаралар қатары сөз болды. Жергілікті теміржолшылар да өтініштерін жеткізіп, ұсыныс-пікірлерін ортаға салды. Ал бөлімше басшысы Владимир Бабиченко Аягөз торабының ардагер теміржолшыларымен арнайы кездесу өткізіп, пікірлерін тыңдады.
Байқау одан әрі Аягөз-Жаңғызтөбе бағытында жалғасты. Ал, апта соңына қарай Шар – Жаңа-Семей теліміне қарай ойыспақ. Одан кейін Дегелең мен Жаңа-Семей, Ауыл, Белағаш, Дүйсекен, №41 жол айрығы телімдерін сүзгіден өткізу жоспарланған.