Белкөл станциясындағы айналмалы үштаған жаңартылды
Қызылорда облысы бойынша меншікті тілші
Белкөл станциясындағы үшбұрышты айналма жолды жаңарту жұмысы жүргізілді. Қызылорда жол дистанциясы мен Белкөл станциясының теміржолшыларының күшімен ескі айналманың пайдалануға жарамсыз рельстерінің орнына жаңа темірбетон шпалдарға бекітілген рельстер салынды.
Магистральдық, маневрлік тепловоздарды, қалпына келтіру пойыздарының көтергіш крандарын және басқа жол бабын жасауға бағытталған түрлі ауқымдағы кіші механизмдерінің қажеттілікке сай жұмыс жасауы үшін үшбұрышты айналманың маңызы зор. Жалпы алғанда тепловоздар мен көтергіш механизмдерді бір бағыттан екінші бір бағытқа бұрып ауыстыруға арналған бұл үшбұрышты үштаған десек те болады. Айналмалы үшбұрыш – осы техникалардың бір бағыттан екінші бір бағытқа айналдырып бұруына арналған механизм. Мәселен, қалпына келтіру пойызының көтергіш кранымен жұмыс жасау қажеттілігі туындаған жағдайда осы үшбұрышпен кері бағытқа айналдырып кранның бағытын өзгертуге болады. Тіпті өндірістік жұмысқа пайдаланылатын магистральдық және маневрлік тепловоздардың өзін қолданылу мерзіміне қарай бағытын өзгертіп отыру үшін де осы үшбұрышқа қажеттілік туындайды екен.
– Белкөл бекетіндегі үшбұрышты айналманы жаңартып ауыстыру жұмысын Қызылорда жол дистанциясының жолшылары жасады. Айналма станция жолдарында салынғандықтан бекеттің теміржолшылары да жаңарту жұмыстарына атсалысуда, – деді Белкөл станциясының бастығы Кенжебек Өтегенов.
Бұған дейін депо ауласындағы айналмалы шеңбер Қамқор-локомотив жөндеу депосының таратылуына байланысты жарамсыз халге келген болатын. Шеңберді пайдалану құқынан шеттетілген аймақ теміржолшылары Белкөл бекетінде бірнеше жыл бұрын салынған айналмалы үшбұрыш-үштағанды қалпына келтіру жұмыстарын жасады.Қызылорда жол дистанциясы мен Белкөл бекетінің теміржолшылары өз күштерімен атқарғанымен оларға көмекке салалас кәсіпорындар келді. Қызылорда электрмен жабдықтау дистанциясының, Қызылорда белгі беру және байланыс дистанцияларының теміржолшылары өздеріне тиесілі жұмысты орындаса, «Integra Construction KZ» мекемесі «Батыс» дирекциясының УК-25/18 көтергіш-төсегіш краны ескі рельс тізбектерін алып, орнына жаңасын төсеу жұмыстарын нәтижелі атқарып шықты.
