Ерекше форматтағы мереке

Кішкентай балақайларға ерекше көңіл-күй сыйлап, олардың қуанышын еселеу мақсатында сырбойылық теміржолшылардың Балаларды қорғау күні қарсаңындағы мерекелік шаралар түрлі форматта өткізіліп жатыр.  

Осындай ойда қаларлық сипаттағы игі іс Облыстық мәслихат депутаты Батырхан Базарбаев басқаратын Қызылорда қосалқы бөлімінде, аудандық мәслихат депутаты Арғын Орымбаев басшылық жасайтын Қазалы вагон пайдалану депосында және Аманкелді Кубенов басқаратын Қызылорда белгі беру және байланыс дистанциясында Қызылорда белгі беру және байланыс дистанциясында жалғасын тапты.

Бөлімдегі көп балалы, бақылауды қажет ететін бала тәрбиелеп отырған отбасыларының ата-аналарымен кездескен Батырхан Базарбаев бұл ата-ананың балаларға қуаныш сыйлайтын мерекемен қатар балалардың құқығын қорғап, оларға қамқор болуға үндейтін мейрам екенін тілге тиек етті. Кездесу барысында бала тәрбиесіндегі, қоғамдық жұмыстардағы белсенділігі үшін бірнеше қызметкерге басшының қолынан алғыс хат пен бағалы сыйлықтар табысталды.

Халықаралық балаларды қорғау күні шарасын "Жас теміржолшы" челленджіне өзіндік үн қосу форматында өткізген Қазалы пайдалану вагон депосының теміржолшылары да балалардың есінде қалар мереке сыйлады.  

– Еңбек ұжымында эмоционалды-мерекелік көңіл күй қалыптастыруды мақсат еткен шарада теміржолшы формасын киген балақайлар техникалық сабақ өтетін кабинетте вагон құрамының макеттерімен танысты. Пойыздардың жүріп-тұруы жайлы, қозғалыс қауіпсіздігінің сақталуы туралы толық ақпараттар алып депо басшылығы мен ата-аналарының жұмыс істейтін орындарымен танысты. Балдырғандардың вагон қараушы, станция кезекшісі, жолшы, тіпті жолсерік болып киінуінің өзі олардың бұл мерекені ерекше құрметтеп, сағына күтетіндіктерін білдіргендей. Адамзаттың алдында тұрған зор міндет – болашақ ұрпақтың бақытты өмірін қалыптастыру. Мереке қарсаңында өсіп келе жатқан жас ұрпаққа теміржолдың жұмысы туралы, оның адам өміріне қауіпті аймақ екені, қауіпсіздік ережелерін түсіндіріп, жас өркенге мерекелік көңіл күй сыйлаған депо ұжымы шара соңында балаларды мерекелерімен құттықтап, арнайы дайындалған сыйлықтар тарту етілді,-дейді депоның кәсіподақ ұйымының жетекшісі Бақытжан Ибраиым.

Ал, Қызылорда белгі беру және байланыс дистанциясы 80 балаға жеміс-жидектермен толтырылған айрықша себеттер әзірлепті. Балаларға тарту етілген сый-сияпаттар мекеме басшыларының қолдауымен, кәсіподақ ұйымдарының әзірлеуімен үлестірілді.