Электрмен жабдықтау дистанциясында жаңғыру жүріп жатыр

Атырау электрмен жабдықтау дистанциясы бұрын 736,3 шақырым желі бойына қызмет көрсетсе, бүгінгі күні оның ұзындығы 860 шақырымды құрайды. 7 электр – Атырау, Аққыстау, Ганюшкино, Мақат, Сағыз, Құлсары, Опорный желілік аудандары бар. Бүгінде дистанция көлемінде жаппай жаңару мен жаңғыру жүріп жатыр.

Дистанцияда 3 көмекші электр станциясы, 41539 киловольттық трансформаторлық станциясы бар. Аудандық желілердің әрқайсысында 20-25 электрмеханиктерден құралған бригада жұмыс жасайды. Бүгінгі күні дистанция 35,6 километр 1000 мың вольттық кабель желілерін, оның ішінде 152,8 километр төменгі вольтты желіні, 65 прожектор матч мұнарасын да қамтиды. Сонымен қатар дистанция қарамағында көптеген елді мекендер мен сауда нүктелері де бар, оларды да жарықпен қамтамасыз етіп отыр. Олардың саны бүгінде 4 мыңның үстінде, негізінен Атырау қаласы мен Мақат ауданы аумағында. Алайда, жеке секторларды жергілікті әкімдіктер бюджеттен қаражат бөліп, өз қарамағына, яғни тұрғын үй-коммуналдық қамту бөлімдеріне біртіндеп алуда.  

Соңғы жылдары дистанция бойынша мердігерлік әдіспен ЭЧ-4 базасын абаттандыруға, Ганюшкино аудандық желісін күрделі жөндеуге, осы желінің сыртқы жарықтандырылуына, шаруашылық әдіспен ВЛ-10 кв, ВЛ-0,4 кв, КЛ-10кв, Кл-0,4 кв желілерін күрделі жөндеуге қомақты қаржы бөлінді. Инвестициялық бюджет бойынша ДГА-100 кВА, 1 автомашинаға лайықталған боксы бар 100 квт транформаторлық шағын станция, Толтыр, Бек-бике, Доссор, Жантерек, Жамансор разъездерінде монтерлік ғимарат салынды. Сондай-ақ Қызылжар, Шоқпартоғай, Бәйтерек разъездерін электрмен жабдықтау бойынша қыруар жұмыс атқарып, нысанды уақытылы пайдалануға берді және бүгінде сол объектілерді жарықпен қамтамасыз етіп отыр. Резервтік ток беруді күшейту мақсатында Ганюшкино, Аққыстау және Мақат станцияларында ДГА-160 кВт қондырғысы, электрмен қамту сапасын жақсарту үшін Ганюшкино мен Мақат станцияларында КТПН-250 кВА жинақтық трансформаторлық шағын станциялар орнатылды. 2022 жылы тағы да 2 дана ДГА-400 кВА генераторы алынып, бірі Атырау, екіншісі Мақат торабы аумағында орнатылды. Электр генераторларының көмегі сол, егер жарық сөніп қалса, генераторлар автоматты түрде қосылып, жолдағы барлық электрге тәуелді құрылғылардың жұмысын іске қосады.  

Дистанция бас инженері Абай Есқалиевтің айтуынша, өткен жылы да бірқатар іргелі істер атқарылған. Пойыздардың үздіксіз қозғалысын қамтамасыз ету мақсатында Мақат, Бек-Бике, Исатай станцияларында ДГА резервтік фидерлер ДГА-100 кВ-ға көшірілді. Мақат, Атырау, Жамансор, Ганюшкино станцияларындағы трансформаторлық қосалқы станциялар төбесі шатырмен жабылса, Жантерек, Жамансор, Доссор, Д.Нұрпейісова станциялары сумен және жылумен 100 пайыз қамтылып отыр. Сағыз аудандық электр торабы ғимараты ең үлкені болғандықтан әрі 1974 жылдан бері жөндеу көрмегендіктен онда кезең-кезеңмен күрделі жөндеу жұмыстары жүргізіліп келеді, шатыры қайтадан жабылды, әктеу, әрлеу жұмыстары жасалуда. Бұған дейін жылу жүйесі тек 25% жұмыс істесе, енді жылу жүйелері түгелдей жаңартылуда. Осылайша дистанция бар қуатымен жұмыс жасап келеді. Жеке секторлардан толықтай арылғасын, дистанция тек қана теміржол саласына ғана қызмет көрсететін болады.