Нағыз теміржолшы еді...

Қызылорда белгі беру және байланыс дистанциясының ұжымы Әкімжан Сағидрахманұлы туралы «Нағыз теміржолшы болып туған жан еді» дейді бірауыздан.

Осыдан тура бір жыл бұрын кенеттен дүниеден өткен Құрметті теміржолшы Әкімжан Қосанов өмірінің соңғы 12 жылында осы ШЧ-39 мекемесін басқарған. Ұзақ жылғы бейнетінің зейнетін көретін жасқа енді жеткенде кенеттен жүрегі сыр берген аптал азаматтың қазасы оны білетін барша теміржолшы қауымға, әсіресе бір отбасыдай болған әріптестеріне ауыр тиген.  

Әкімжан Сағидрахманұлы 1959 жылдың 17 желтоқсанында Қызылорда облысы Арал ауданы Сапақ станциясында теміржолшы отбасында дүниеге келген. Әкесі Сағидрахман Қосанов та кезінде Құрметті теміржолшы атанған мықты сала маманы болды. Ата-анасының тұңғышы Әкімжан өзінен кейінгі алты іні-қарындасының қамқоршысы болып ерте есейіп, еңбекке де ерте араласқан екен. Еңбек жолы теміржолдың ең төмен сатысы – монтер, механиктен басталып, барлық кәсіби әрі басқарушы деңгейден өтіп, мекеме басшысы дәрежесіне дейін өскен. Алматы теміржол инженерлері институтын үздік тәмамдаған.  

– Әкімжан Қосановтың жарқын бейнесі көз алдымызда, білімді де білікті басшы, істің көзін таба білетін мықты ұйымдастырушы еді, ұжым алдындағы абырой-беделі өте зор болатын. Адамгершілігі мен сыйластығы ерекше, қайырымы мол азамат ретінде мәңгілік жүрегімізде сақталады, – дейді ШЧ-39 кәсіподақ ұйымының төрайымы Ғалия Қожахметова.  

Қызылорда белгі беру және байланыс дистанциясын басқарған жылдары ұжым салалық жарыста талай рет топ жарған, ал Әкімжан Сағидрахманұлы өткен жылы «Үздік басшы» атағын иеленген еді деп еске алады әріптестері.