«100 жас есім»: Ақтөбелік жас теміржолшылар игі істерге мұрындық болуда
Ақтөбе облысы бойынша меншікті тілші
«100 жас есім» жобасы қанат берген ақтөбелік жас теміржолшылар игі істерге мұрындық болуда. Жүзден жүйрік, мыңнан тұлпар шыққандар тазалық акциясы мен қайырымдылық шараларын бастады.
«Ақтөбеден 14 жас теміржолшы Түркістан қаласында өткен бірінші модульге барып келді. Қазіргі күні үй тапсырмаларын орындап жатырмыз. Оның ішінде қоғамдық жұмыс, қайырымдылық шара, челлендж өткізу секілді 10-12 бағытта жұмыс жүргізетін боламыз», – деді жобаға қатысушы Ақтөбедегі пойыздарды басқару орталығының диспетчері Қайыржан Мәдиев.
«100 жас есім» жобасының арнайы уақыты – екі жыл. Осы уақыт ішінде төрт-төрт модульден өтеді. Түрлі тренинг, тапсырма, жобалар жасалып, жастар кәсіби де, рухани да тұрғыда жетілуі көзделеді.
«Ақтөбе байланыс және көлік коммуникациялар колледжіне барып, студенттермен кездестік. Темір жолдағы жұмыс, елдегі жастар саясаты, жас мамандарға жасалған мүмкіндіктер сөз болды. Ұлттық компания тарапынан жастарға жасалған қамқорлық жөнінде айтылды. Бұл болашақ теміржолшыларға ерекше әсер етті», – деді жоба қатысушысы, Жедел реттестіру жұмыстары жөніндегі бөлім басшысының орынбасары Әнуар Иштаев.
Сонымен қатар осы жастардың бастамасымен теміржолшылар арасында шағын футбол ұйымдастырылып, оған бес команда қатысты. Үздік командалар мен мықты ойыншылар марапатталды. Қазіргі уақытта «100 жас есім» жобасының жеңімпаздары жергілікті телеарналарға сұхбат беріп, теміржолшылардың жұмысы туралы, жасалып жатқан жұмыстар туралы баяндап жүр. Ұйымдастырылған бастамалар тек теміржол төңірегімен шектелмей, қалаға, қоғамға үлес қосу мақсатында жастар Ақтөбе су қоймасына барып тазалық сенбілігін жүргізді.
«Алдағы мақсат – қайырымдылық шарасын ұйымдастыру. Бұл – түптеп келгенде қоғамдық жоба. Ел назарын аударуға лайық, игі ісі жұртқа үлгі боларлық жастар таңдалып, олардың ашылмаған қырлары көрініп жатыр. Халық алдында емін-еркін сөйлеп, өз ойын жеткізе алатын лидерлер қалыптасып келеді», – деді Ақтөбе жол бөлімшесі белсенді жастар жетекшісі Дархан Әнуаров.
100 жас есім жеңімпаздары қазір шілде айында өтетін екінші модульдік оқуға баруға дайындық үстінде.
