Ең қысқа толаскез

Қызылорда магистральды желі бөлімшесіне қарасты Марат Оңалов басқаратын Қызылорда жол дистанциясының теміржолшылары Белкөл станциясында 20 минуттық толаскез алып, межеленген жұмысты сәтті орындап шықты.  

Пойыздардың қозғалыс қауіпсіздігін сақтауды арттыру мақсатында аймақ жолдарының технологиялық талаптарға сай болуына жауапты жол дистанцияларының жұмысшылары үшін күннің аптап  ыстығы да кедергі емес.   Белкөл станциясының солтүстік алқымында жұмыс жасап жатқан Қызылорда жол дистанциясы 1-телімінің жол жөндеушілері  жол шебері Рахат Әлжановтың басшылығымен станцияның 2-жұп жолындағы 10-бағыттамалық бұрманың СПК рельсін ауыстырып жатыр.  

– Бүгінгі жұмысты арнайы берілген ескертпе бойынша орындап жатырмыз. Барлық жұмысты алдын ала дайындап алып, небәрі 20 минуттық  толаскез ішінде ауыстырып бітуіміз керек. Міне, 11 сағат 52 минутта басталған толаскез санаулы минуттардан соң,  12 сағат 12 минутта нәтижелі аяқталып жатыр. Осы уақыт ішінде 8 метр және 7,45 метрлік екі СПК рельсі ауыстырылды. Пойыздардың өткізілуіне кедергі болған жоқ. Жолшылар бригадирі Серікбай Жұмағұлов пен жол жөндеушілер Бақытжан Ақбалаев, Қазбек Жүсіпалиев, Айдар Баймұратов, Ерболат Тұранов, Орынбасар Атабаевтардың еңбегіне алғыс айтамын,  – деді жол шебері Рахат Әлжанов.

Жылдам қимылдап, әрқайсысы өзіне тапсырылған жұмысқа жұмылған жолшылар қимылына көз ілеспейді. Ағымдық жол жөндеу жұмысы бағыттамалық бұрмада жасалып жатқандықтан мұнда қойылған электрожетектің қалыпты жұмысы бұзылмауына Қызылорда белгі беру және байланыс дистанциясының электромеханигі Мақсұт Пахрадин бас-көз болып, жұмыстың технологиялық талап деңгейінде жасалуын қадағалауда.

Жолшылардың жол жөндеу жұмыстарына қажетті құрал-саймандары жеткілікті көрінеді, маусымдық киімдері мен ыстықтан қорғанатын заттармен жеткілікті қамтамасыз етілген.