Керекулік теміржолшылар 12 км көлемде мал өтпейтін қоршау салды
«Қазақстан теміржолшысы» газетінің тілшісі
Жаз – темір жолды жөндеу жұмыстарының қызған шағы. Көктемде оңтүстіктен бастау алған жол жұмыстары бүгінде солтүстік өңірге ойысқан. Павлодарда күрделі жөндеу жұмыстары мердігерлік тәсілмен жүргізіліп жатыр.
Биыл өңірде 55 км шамасында жол күрделі жөндеуден өтуі тиіс болса, қазір соның 28,7 км немесе 52% орындалған. Таратып айтсақ, ПЧ-32 жол дистанциясына қарасты Спутник – Дегелең телімі бойында Көктебе – Құркөл аралығындағы 59-дан 88 км және Ақсу-2 – Құркөл аралығындағы 33-ден 59 км арасындағы жолдар күрделі жөндеуден өтуде. Көктөбе – Құркөл аралығында жөндеу жұмыстары барысында 9 жұп рельс иіні төселген, енді қиыршық тасын үстемелеп, белгілі бір нормаға жеткізу қажет етіліп отырған көрінеді.
Биылғы жыл еншісіне, Қырқыншы ПЧМ техникаларын жұмылдыра отырып, шаруашылық тәсілмен рельс тіректерін тұтастай алмастыру шаруаларын атқару жоспарланған екен. Бұл жұмыстар 18 шілдеден басталды. Яғни, аталған жұмыс түрі Екібастұз – Ерейментау телімі бойындағы ОП116 – Шідерті аралығындағы 273-тен 278 км арасында тақ жолда 5,4 км көлемінде жүргізілмек. Сонымен қатар 4,78 км жол бойында ескі рельс иіндерін алмастыру, бағыттағыш бұрмалардағы білеулерді темірбетонды негіздегі 60 жиынтық білеумен ауыстыру жұмыстары қарастырылған. Қазір жолшылар осы шаруаларды атқаруға кіріскен. Сондай-ақ, бұрма білеулерін су жаңа темірбетонды түрімен алмастыру жоспарланған. Биыл 60 жиынтықты ауыстыру межеленсе, қазір соның жартысы орындалған.
Пойыздардың қозғалыс қауіпсіздігін сақтау тек жол табанын жаңартумен шектелмесі анық. Керекулік теміржолшылар 12 км көлемінде жаңадан мал өтпейтін қоршаулар салып, 11 км ескі қоршауларға ағымдық жөндеу жұмыстарын жүргізген.