Қауіпті кәсіп иелері

Қызылорда электрмен жабдықтау дистанциясында тәжірибелі мамандар еңбек етеді.  Қуат көзімен жұмыс істейтін  ең қауіпті кәсіп иелері үшін әрбір жұмыс күнінің  тосын жағдайсыз өтуі маңызды.   

Жыл басынан бергі атқарылған жұмыстар нәтижесіне шолу жасаған Қызылорда электрмен жабдықтау дистанциясы басшысының орынбасары Алмат Жүсіпбеков тәжірибелі мамандардың өзі тоқ көзі құрылғыларымен  тек «сіз» деп сөйлесіп, абайлап әрекет жасайтынын жеткізді.  

«Онсыз болмайды, жоғары кернеулі электр қуаты жүретін тоқ бойы қауіп-қатерге толы, мүлт кетсең бітті... Сондықтан бізде қауіпсіздік тақырыбы күн тәртібінен түскен емес, техникалық сабақтарда да ұдайы қайталанып айтылып, кез-келген жұмысшы ережені жаттап алуы талап етіледі», – дейді ол.    

Дистанция телімдеріндегі СОБ құрылғыларының электр қуатының болмауынан жұмыстан тыс қалуы жарты жылда 5 рет қайталанып, сигналдардың жабылып қалуы 2 рет орын алған.  Себеп салдары анықталып, құрылғыларға ағымдық күтім жасаудың кешенді шаралары жүргізілуде. Жыл басынан бері автобұғаттау жоғары желілерінің 400 шақырымына жоспарланған ағымдық жөндеу жұмыстары жасалып,  бүгінгі таңда оның 360,9 км аяқталған.  Желілердің 60 ағаш бағанасы  мен 120 дана оқшаулағыш ауыстырылып,  бағаналар күшейтілген.

Желілердің тоқ өткізу қабілетін күшейту үшін 0,3 шақырым аумақтың кабельдері жаңартылған.Төменгі вольтты әуе желісінің 0,54 шақырымына ағымдық күтім жасалған. Дистанция электромеханиктері мен монтерлері күнделікті желі бойын жағалап, тоқ көзін таратушы нысандардың кідіріссіз жұмыс жасауын қамтамасыз етеді.

– Метеорологиялық ауытқуларға байланысты орын алуы мүмкін апаттарды телімдер электр қуатынсыз қалмауы үшін дизель-генераторлардың қолданысқа дайын тұруын назарда ұстаймыз, – деді Қызылорда электрмен жабдықтау дистанциясы басшысының орынбасары Алмат Жүнісбеков.