Теміржол бойындағы қоршаулар ұзарып келеді
Атырау облысы бойынша меншікті тілші
Атырау магистральдық желі бөлімшесінде жыл сайын жол дистанцияларының өз күшімен теміржол бойын малдан оқшаулау, қоршау, яғни тосқауыл-шарбақ салу жұмыстары жүргізіліп келеді.
Атырау темір жолдары Құрманғазы, Исатай, Махамбет, Мақат, Қызылқоға, Жылыой сынды алты аудан аумағын қиып өтеді. Әсіресе қауіпті саналатын жерлер Атырау-Махамбет, Махамбет-Қызылжар, Бақсай-Аққыстау, Құлсары-Шоқпартоғай, Жантерек-Мұқыр-Сағыз, Ганюшкино-Атырау аралықтары. Бүгінде 300 шақырымнан астам жерде қоршау бар, ол барлық ұзындықтың тек 40 пайызын құрайды. Соның ішінде Атырау жол дистанциясы бойынша 118 шақырым, Сағыз-Мақат-Атырау-Ганюшкино-рзд Д.Нұрпейсова учаскесі және Құлсары дистанциясы бойынша Мақат-Құлсары-Бейнеу учаскесінде 106 шақырымды алып жатыр. Бөлімшенің жол шаруашылығы қызметкерлері күшімен биылғы жылы 149,2 км қоршау тұрғызылуы жоспарланып, биылғы алты айда ПЧ-9-Атырау – 62 км, ПЧ-11-Құлсары – 36 км қоршау салынды. Былтыр 77 шақырым жол қоршалған. Оның ішінде ПЧ-9-Атырау – 40 шақырым, ПЧ-11-Құлсары – 37 шақырым. Қазіргі уақытта да жұмыс жалғасып, қолданыстан шығарылған ескі шпалдар қада ретінде орнатылып жатыр, оған сым қоршаулар байланады.
– Қозғалыс қауіпсіздігіне нұқсан келтіретін жайттың бірі осы мал басу оқиғалары, сондықтан бұл қоршаулардың көмегі бары рас. Өткен жылдың 6 айында малдың жолға шығуына байланысты пойыздардың 17 шұғыл тежеу оқиғасы орын алған болса, биылғы жылдың өткен мерзімінде мал басудың 20 оқиғасы тіркеліпті. Көптеген мал иелері жергілікті табиғат жағдайына байланысты малды жайылуға бос қоя береді. Ірі қара малдың жол бойына шығуының артында апат қаупі, экономикалық-материалдық шығындар жатқанын естен шығармауымыз керек, – дейді бөлімше басшысының міндетін атқарушы Амангелді Рахмеденов.