Қызылорда қосалқы бөлімінен 68 теміржолшы марапатқа ие болды
Қызылорда облысы бойынша меншікті тілші
Көлік қызметкерлері күні Түркістан мен Сексеуіл-Қоскөл станциялары арасында еңбек етіп жүрген әріптестерімен мәжіліс залында кездескен аймақтың бас теміржолшысы Батырхан Базарбаев тағдырын тәулік бойы тынымсыз еңбекке арнаған теміржолшылардың ерен еңбегіне шын көңілден алғыс айтты.
Қызылорда қосалқы бөлімінің алғашқы жартыжылдықтағы нәтижелеріне шолу жасаған Батырхан Бақытбекұлы жылжымалы құрамдардың қозғалыс қауіпсіздігін сақтауды арттыруға бағытталған шараларды да тілге тиек етті.
Үздіктерді марапаттауға кезек келіп, Сексеуіл локомотив депосының нұсқаушысы Мұхтар Игіліков пен Сексеуіл станциясын басқарған теміржолшы Сапарғали Салмаевқа «Құрметті теміржолшы» төсбелгісі тағылды. «Адал еңбегі үшін» төсбелгісі Қызылорда станциясы жүк кеңсесі бастығы Гүлнәр Мұсаева мен Арал теңізі станциясының пойыз құрастырушысы Әлімбай Бисембаевтың кеудесінде жарқырады. Сонымен қатар өндірістік оқыту шебері Базаркүл Қалымбетова, инженер-технолог Әділбек Жалымбетов, локомотив слесарі Айнабек Түктібаев, таспа талдаушы Шәкіржан Қарақұлов, вагон қараушы Сеитқали Алпысбаев пен Шанжархан Сарманов «ҚТЖ» ҰК» АҚ Басқарма төрағасының Құрмет грамотасымен марапатталды.
Жалпы «ҚТЖ-ЖТ» ЖШС «Батыс» филиалы Қызылорда қосалқы бөлімінен 68 теміржолшы түрлі деңгейдегі марапатқа ие болды. Олар – аймақ теміржолының дамуына сүбелі үлес қосып жүрген теміржолшылар.
