Өрт сөндіру пойызының мамандары біліктіліктерін шыңдады

Биыл жазғы маусым Тараз станциясындағы өртке қарсы пойызының ұжымы үшін тыныш өтті. Түлкібас – Жамбыл, Жамбыл – Жаңатас, Жамбыл – Түрксіб аралығындағы телімге қызмет көрсететін өртке қарсы пойызының сарбаздары жыл басынан төрт оқу-жаттығу шарасына қатысты.

–  Бүгінгі күні станциялар мен телім, вокзалдарда өртке қарсы шараларынан бөлек терроризмнің алдын алу бойынша да жаттығуларға қатысамыз. Станцияда тұрған пойыз құрамындағы  үш цистерна әрқайсысы 50 тонна сумен дайын тұр. Цистерналар  2020 жылы деполық жөндеуден өтіп, пайдалану мерзімі 2025 жылға дейін ұзартылды. Ал қызметкерлерге арналған вагон 2022 жылы күрделі жөндеуден өтіп, оның жарамдығы 2033 жылға дейін созылған. Вагон су шашатын насос, электр маторы техникалық және жарық беретін құрылғылармен түгел жабдықталған. Жаздың аптап ыстығында желдеткіші бар, қыс маусымында жылы. Қазір күзгі комиссиялық байқауға дайындықты бастадық, – дейді Тараз станциясындағы өртке қарсы пойызының бастығы Марат Керімқұлов.

Болат жолда 46 жыл еңбек етіп келе жатқан Марат Әбенұлы Республика күніне орай «Ерен еңбегі үшін» медаліне ұсынылып отыр. 16 жасында Алматы темір жолы  Жамбыл бөлімшесіне қарапайым жұмысшы болып кірген ол 1989 жылдың желтоқсан айына дейін әртүрлі жұмыстар атқарған. 1989 жылы Түрксіб станциясындағы өртке қарсы атқыштар Жамбыл отрядына ауысып 1992 жылға дейін сарбаз, 1995 жылы қарауыл бастығы болады. 2000 жылы Түрксіб станциясындағы өртке қарсы пойызына өрт сөндіруші және осы жылы Тараз станциясындағы өртке қарсы пойызы бастығының орынбасары болып ауысады. Ал, 2013 жылдан бері пойыз бастығы.

–  Біздің әулетті – Теміржолшылар династиясы десе болады. Әкемнің үлкен әпкесі Зияда Керімқұлқызы Жамбыл локомотив пайдалану депосында кір жуушы, екінші әпкесі  Саракүл Түрксіб станциясында жол мантері болған. Әкем Әбен Түрксіб станциясында машинист болған. Анам Күлімхан осы станцияда киім тігуші болып еңбек етті. Енді біздің жолымызды балаларым жалғап отыр. Қызым Қ. Байсейітова Жамбыл бөлімшесінде материалдық есепші, үлкен ұлым Марат «Луговой рельс дәнекерлеу кәсіпорнында» рельс тасымалдаушы. Екіншісі Бақытжан Түріксіб станциясында пойыз құрастырушы. Енді немерелерім аталарының жолын жалғаса, ол маған мақтаныш, – дейді Марат Керімқұлов.

Мекемеде 12 қызметкер, 3 диспетчер бар. Олардың барлығы бейсенбі күні техникалық оқуға қатысып, 24 сағат дайындықта тұр. Ауысыммен жұмыс істейтін қызметкерлерді дабыл қағылғанда пойызға жеткізетін УАЗ «Фермер» көлігі де жаңа. Биыл сегіз маман біліктіліктерін көтерсе, соңғы 15 жылдың көлемінде өндірістік жарақат алу оқиғасы болмаған.