Жайдарман: Маңғыстаулық теміржолшылар чемпион атанды (Фото)
Маңғыстау облысы бойынша меншікті тілші
16-17 тамыз күндері Ақтөбе қаласында «ҚТЖ» ҰК» АҚ Басқарма төрағасының кубогы сарапқа салынған жайдарман ойындары өткен. Сол тартысты додада жерлестеріміз – «Маңғыстау.кз» командасы чемпион атанып, түбекке басқарма төрағасының кубогымен оралды.
Жайдарманшы жігіттерді Маңғыстау қосалқы бөлімі бастығы Нәжімеден Ғұбашов қабылдап, жеңістерімен құттықтады. Өнерлі жастарды алғыс хатпен марапаттап, қашан да қолдау білдіруге дайын екенін жеткізді.
Еске сала кетсек, жерлестеріміз жеңімпаз болған бұл сайыста еліміздің барлық өңірінен 11 команда қатысып, өнер көрсеткен еді. Соның ішінде бірінші орын мен «Ең мықты әзіл» номинациясы түбектің жігіттеріне бұйырса, екінші орын ақтөбеліктерде қалды. Үшінші орынды астаналық команда иемденді. Тараздық теміржолшылар командасы «Көрермен көзайымы» аталымымен марапатталды.
– Сайысқа Маңғыстау теміржолынан бесеу болып бардық. Оның екеуі Бейнеу жол дистанциясында жол монтері, біреуі Маңғыстау локомотив депосында машинист көмекшісі, тағы біреуі Маңғыстау станциясында техникалық бөлімде жұмыс істейді. Бәрі де өз саласының ғана маманы емес, сегіз қырлы, бір сырлы жігіттер. Өзге өңірлерден келген әріптес-қарсыластарымыз да мықты болды. Дегенмен кубок бізге бұйырды. Ойын өте керемет өтті, – дейді «Маңғыстау.кз» теміржолшы- жайдарманшылар командасының капитаны, Маңғыстау вагон депосында вагон қараушы Қуатбек Көпбаев.
