Жамбылда жоспарлы жұмыстар жасалды
Тараз қаласы бойынша меншікті тілші
Биылғы жазда Жамбыл өңірінде таулы аймақтарда өрт болғанымен, тілсіз жау болат жолдың бойына жақындай қоймады. Бұл мақсатта Алматы екпе ағаштар дистанциясына қарасты Жамбыл учаскелік телімінің мамандары өздеріне тиісті жұмыстарын тыңғылықты атқаруда.
Темір жол бойын тазартып, табиғи факторлардан қорғайтын тал-дарақ отырғызып, оның күтімімен айналысып, оттан қорғау үшін күзде жол жиегін жыртып дегендей қыруар жұмыспен айналысатын бұл дистанцияның қызметі осал емес. Жамбыл учаскелік телімі Жамбыл және Түркістан жол бөлімшелері бойынша биыл да жоспарлы жұмыстарын ойдағыдай атқарды.
– Биыл бірталай жоспарлы жұмыстар жасалды. Жол бойын өрт қаупінен қорғау үшін болат жолдың екі шетін ала, арасына белгілі интервалдық қашықтықпен 1596 гектар жыртылуы керек болса, бүгінгі күні ол 970 гектарға орындалды. Сонымен қатар ағаштардың төбесі мен қураған бұтақтары кесілді. Оның жоспары 180,3 гектар болса, орындалғаны – 117,3 гектар. Жұмысшылардың жүріп-тұруына бір «КАВС» автобусы, бір дана «Фермер» УАЗ көлігі және жер жырту жұмыстарына бес трактор қызмет етеді, – дейді Жамбыл учаскелік телімінің бастығы Айдос Асабаев.
Мекемеде 45 жұмысшы бар. Олар көктем, күз бен жаз айларында жоғарыдағы жұмыстарды атқарса, қыста пойыздар қауіпсіздігіне қар мен боран кедергі келтірмес үшін жолшыларға көмектеседі.