Биылғы Жолдаудың теміржолшылар үшін маңызы зор

Ел шығысындағы теміржолшылар қауымының қоғамдық-саяси өмірі де белсенділікке толы. Республика көлеміндегі маңызды саяси оқиғалар назардан тыс қалмайды. Бұл орайда «Аманат» бастауыш партия ұйымының ұйытқы болуымен түрлі іс-шаралар жиі ұйымдастырылып тұрады.

Жуырда семейлік теміржолшылар қауымының басын қосқан ерекше жиын өтті. Аталған басқосудың кіріспе сөзін бөлімше бойынша бастауыш партия ұйымының төрайымы Айгүл Берікболова алғысөзбен ашып, жуырда балып откен ел Президенті Қасым-Жомарт Тоқаевтың Қазақстан халқына Жолдауы жайында сөз өрбітті. Сонымен қатар арнайы баяндама жасау үшін сөз кезегін Семей жол дистанциясының директоры, партия белендісі, Құрметті теміржолшы Рахат Ботаспаевқа берді. Ал ПЧ-39 басшысы өз кезегінде «Әділетті мемлекет. Біртұтас ұлт. Берекелі қоғам» атты ағымдағы жылғы 1 қыркүйекте жасалған Президент Жолдауы жайлы келелі пікір білдірді.

– Биылғы Жолдаудың теміржолшылар қауымы үшін, жалпы көлік қызметкерлері үшін маңызы зор. Себебі еліміз бойынша Президенттің пәрменімен Көлік министрлігі қайта құрылып, жұмысын бастады. Осы сынды аса өзекті мәселелер кезек күттірмей орындауды талап етеді. Оның ішінде Мемлекет басшысының еліміздің логистикалық әлеуетін арттыру жайындағы бастамалары да біздің басты назарымызда болып отыр. Бұл орайда біздің алдымызда жаңа теміржол телімі, елімізді Қытаймен жалғайтын Аягөз – Бақты теміржолын салу сынды жауапты да күрделі міндет тұр, – деп атап өткен Рахат Нұрғазыұлы Жолдауда атап көрсетілген тағы да бірқатар басымдықтар жайын сөз етті.  

Сонымен қатар жиын барысында Семей вагон пайдалану депосының технигі Ерлан Қарамұрза, бөлімше диспетчері Жанат Сүлейменова да сөз алып, Жолдау басымдықтары жайында көпшілік алдында ой бөлісті.