Сырбойлық теміржолшылар сенбілік өткізді
Қызылорда облысы бойынша меншікті тілші
Әр мекеменің айналасын айнадай таза, қыздың жиған жүгіндей жинақы ұстайтын сырбойылық теміржолшылар тазалық маусымы басталғалы апта соңында сенбілік өткізуге кірісті.
Өткен сенбіде Арғын Орымбаев басқаратын Қазалы вагон пайдалану депосына қарасты Қызылорда, Шиелі, Жосалы, Төретам, Қазалы, Арал теңізі және Сексеуіл станцияларындағы техникалық қызмет көрсету бекеттерінің теміржолшылары жалпы сенбілік ұйымдастырып, оған бір кісінің баласындай қатысты.
– Тазалықты сақтау, қоршаған ортаға жанашырлықпен қарап оны мәпелеп, күте білу – барлық отандастарымыздың басты міндеті. Тазалықты жанына серік еткен теміржолшылар депо ауласын, ғимараттардың қасбеттерін әктеп, сырлап, теміржол өткелдері мен жол айрықтарын қоқыстан тазартты, – дейді депо бастығы Арғын Орымбаев.
Депо басшысының айналаны тәртіпке келтіру, таза ұстау бастамасына депоға қарасты барлық ТҚКП-ның жұмысшылары қызу қолдау білдіріп, өз істерімен өзгелерге үлгі бола білді. Мәселен, облыс орталығы Қызылорда станциясындағы техникалық қызмет көрсету бекетінің теміржолшылары бекет аумағындағы Сүлейменов пен Егізбаев көшелеріне дейінгі аралықты тазалап, ретке келтірсе, қазалылық вагон қараушылар Әйтеке би кентінде қолға алынған тазалық жұмыстарына күл-қоқыс шығаруға арнаулы техникалық көлік құралдарын жұмылдырып, сенбілік аясында үлкен шаруалар тындырды.
