Құлсары станциясына жаңа басшы тағайындалды
Атырау облысы бойынша меншікті тілші
Қазіргі заманға сай нарық сұранысын қанағаттандырып, өлке өнеркәсібінің еселей дамуына зор үлесін қосып отырған Құлсары станциясына жуырда жаңа басшы – Жүсіп Қалиханов тағайындалды.
Жүсіп Қалиханов жас кадрлар қатарынан. Еңбек жолын Орал темір жол бөлімшесіне қарасты Қазақстан станциясында пойыз құрастырушыдан бастаған, сигналист, станция кезекшісі, пойыз диспетчері қызметтерін атқарған. Ақтөбе жол техникумын және ҚазАТК-ны тасымалды ұйымдастыру мамандығы бойынша тәмамдаған. 2010 жылы Құлсары станциясында логистика бойынша орынбасар қызметін атқарды. Сегіз жыл бойына жүк тасымалының қыр-сырын меңгеріп, 2018 жылы ақпанда Махамбет станциясы басшылығына келген ол мұнда бес жыл еңбек етті. Атырау жүк тасымалы бөлімшесінің басшысы Аслан Базарғалиев ұжымға жаңа станция бастығын таныстырып, жемісті еңбек тіледі. Станция жұмысын әрі қарай жандандырып, тасымал көлемін арттыру, негізгі жүк қабылдап-жөнелтуші «Теңізшевройл» ЖШС және басқа да мекемелермен қоян-қолтық жұмыс жасауды тапсырды.
1967 жылы пайдалануға берілген Құлсары станциясы мұнай және газ, басқа да мұнай өнімдерін тасымалдаушы маңызды арна саналды. Теңіз кен орнының дамуымен өлкедегі көлік-коммуникация кешені де беки түсті. Сол себепті мұнай кәсіпшілігінің қарқынды дамуына орай станцияда жаңа жолдар салынып, паркі кеңейді. Бүгінгі таңда 20 кірме жолға қызмет көсетіп, 120 серіктесімен қоян-қолтық жұсыс істеуде. Тәуліктік жүк тиеу-түсіру көлемі 650-700 вагонды құрап, 25-30 жұп жүк пойыздары өтеді.