Күзгі комиссия: жаз бойы атқарылған жұмыстардың сапасы басты назарда

Ел шығысындағы Семей ЖТ бөлімшесі бойынша күзгі комиссиялық байқау өтіп жатыр. Қазіргі күнге дейін Жаңа-Семей – Дегелең, Семей – Локоть және Ақтоғай станциясы мен Жаңа-Семей аралығында толыққанды түрде тексеру жұмыстары жүргізілді.

Биылғы байқаудың жылдағы шаралардан ерекшелігі көп. Әсіресе өрт қауіпсіздігі мен желі бойының қос қапталының санитарлық тазалығы да баса есепке алынды. Сонымен қатар бөлімше басшылары әрбір айырма пункттерде тұратын өзге де қарапайым халықпен жүздесіп, талап-тілектерін ескерді.  

Жалпы, теміржол бойын толық сүзіп шыққан шаруашылық ревизорлары жаз бойы атқарылған жұмыстардың сапасын да басты нысанаға алды. Бұл орайда Жаңа-Семей жол дистанциясының аумағы саналатын Жарма-Жаңғызтөбе-Шар телімі бойындағы күрделі жөндеу жұмыстары мұқият тексерілді. «ҚТЖ» ҰК» АҚ Қозғалыс қауіпсіздігі департаменті Семей телімінің аймақтық бас ревизоры Темірбек Акчалов бастаған топ жолшылар жұмысын айрықша қадағалауға алды. Осынау орайда РБ-6 аппараты анықталған кемшіліктер мен ақаулықтар бойынша арнайы есеп дайындауда. Ол бойынша алдағы уақытта селекторлық жиын өткізілмек.  

Сонымен қатар желі бойында үзіліссіз жұмыс жүргізген бөлімшенің жаңадан тағайындалған директоры Алмас Сейсемқанов пен Семей магистральдық желі бөлімшесінің басшысы Айдын Шәукежанов қатардағы теміржолшыларды да сөзге тартып, өтініш-тілектеріне құлақ түрді.  

Тексеру, қадағалау шараларынан бөлек, пойыз құрастыру жұмыстарына, шалғай станциялардағы маневрлік локомотив бригадаларының қызметіне, нақтырақ айтсақ, олардың еңбек және демалыс режимінің белгіленген тәртібін сақтауына да ерекше назар аударылды. Мұның сыртында желі бойындағы барлық мекемелердегі өндірістік процесс те қатаң тексерілді.  

Күзгі комиссиялық бақылау шаралары қазіргі таңда бөлімшенің Өскемен аумағы бойынша жүргізілуде. Қазан айының 7-сі күні толық аяқталып, алынған нәтиже толыққанды сарапталатын болады.