Семейде кәсіподақ белсенділері марапатталды
Абай облысы бойынша меншікті тілші
Семейлік теміржолшылар Қазақстан Республикасы Кәсіподақтар күнін салтанатты түрде атап өтті. Семей ЖТ бөлімшесінің басшысы Алмас Сейсемқанов пен Семей магистральдық желі бөлімшесінің бастығы Айдын Шәукежанов көпшілікті мерекемен құттықтап, еңбекші халықтың мүддесін қорғайтын қоғамдық ұйым жұмысына сәттілік тіледі.
«Қазкөліккәсіп» ҚБ Семей жүк тасымалы бөлімшесі кәсіподағының төрағасы Есен Қажығұлов есепті баяндама жасап, жыл көлеміндегі атқарылған шараларға тоқталып өтті. Атап айтсақ, көпбалалы отбасыларға қолдау көрсету, республикалық «Мектепке жол» акциясы сынды бірқатар әлеуметтік іс-шаралар сәтімен жүзеге асырылған. Сондай-ақ ұжымдық шартқа сай, әр теміржолшы лайықты көмек пен әлеуметтік кепілдіктер алып келеді. Мұнымен қатар, кәсіподақ мүшелерінің құқығын қорғау мен еңбек қауіпсіздігін сақтау, қайырымдылық шараларын ұйымдастыру және бұқаралық спортты дамытуда да елеулі жұмыстар жасалған.
Салтанатты жиын барысында салалық кәсіподақ жұмысына белсене араласып, қоғамдық жұмыстарда ерекше көзге түсіп жүрген бірқатар теміржолшылар марапатталып, түрлі сый-сияпатқа ие болды. Олардың арасында қайырымдылық шараларын өткізу мен спорттық сайыстарды ұйымдастыруда белсенділік танытып жүргендердің қатары көп екен. Әрқайсысы теміржол бойында түрлі салада еңбек етеді. Бірі жол дистанциясында техникалық бөлімнің бастығы болса, енді бірі электромеханик болып қызмет атқарады.