Теміржолсу-Қызылорда жылу маусымына сақадай сай
Қызылорда облысы бойынша меншікті тілші
Алдағы қысқа тыңғылықты дайындық жүргізген мекемелер қатарында Теміржолсу-Қызылорда да бар. Жылу беретін маусымға қазандықтарды жүз пайыз дайындаған серіктестік аймақтағы теміржол нысандарын жылумен қатар ауыз сумен де қамтамасыз етеді.
Теміржолсу-Қызылорда серіктестігінің бастығы Насыр Абдулланың айтуынша, бүгінгі таңда нысандарды биылғы жылытуға қажетті көмірдің 414 тоннасы қоймаларға жеткізілген. Соңғы бірнеше жылда аймақта бірнеше станциядағы жылыту пештері көгілдір отынға ауыстырылып, газбен жылытуға көшкен. Дегенмен, әлі де көмір арқылы жылытылатын нысандар баршылық. Жылу желілері мен қазандық пештері жылу беру маусымы кезінде жұмыстан тыс қалмауы үшін алдын ала ағымдық жөндеуден өтіп, қазандықтарға техникалық тексеру жүргізіліп, жылу жүйелеріне гидравликалық сынақпен толықтай жуып-шаю жұмыстары жасалады.
– Көгілдір отынмен жылытылатын Тереңөзек, Белкөл, Шиелідегі екі пеш және Жаңақорған станцияларындағы газ қолданылатын жылыту пештерін жылу маусымына дайындап, 1621 метр шамасындағы жылу желілерін қысымды тазалықтан өткізіп, кем-кетігін түгендедік. Жалпы саны сегіз қазандық жылу беру маусымына сақадай сай тұр, – деді Насыр Абдуллаұлы.
Аймақтағы көгілдір отынға қосылған бес пешке қажетті газ және көмірмен жылытылатын 3 қазандықтағы пешке қажетті көмір жеткізу үшін құзырлы органдармен келісім жасалған. Көмір Төретам, Жосалы және Жалағаш станцияларындағы жылу қазандықтарының отын қоймаларына жеткізілген. Сонымен қатар газбен жылытылатын пештерге газ болмай қалу қаупі туындаған жағдайда пайдаланатын көмір қорымен оларды да қамтамасыз ету қарастырылады екен. Жылу қазандықтарының от жағушы машинистері арнайы киімдермен, қорғаныш заттармен қамтылып, зиянды жұмыс үшін берілетін қосымша, үстемелерін алып отыр.
Әрине, бүгінде салқын ерте түсетін солтүстік өңірде жылу беру маусымы әлдеқашан басталды. Ал оңтүстік, бастыс аймақтарда ол жылдағы кесте бойынша 15 қазанда, ауа райына байланысты кейде одан да кеш қосылуы мүмкін. Қызылордада, соның ішінде теміржол мекемелерінде де осы аптада жылу беріле бастады.
