Тарихи ғимарат қайта түлеуде

Бір ғасырдан астам уақыт жолаушыларға қызмет етіп келе жатқан Қызылорда теміржол вокзалы күрделі жөндеуден өтіп жатыр. Тәулігіне жүздеген жолаушы келіпкетіп жатқан қаланың бас қақпасына жүргізіліп жатқан жөндеу жұмыстары қараша айында бітіп, пайдалануға беріледі деп күтілуде.

Бүгінде вокзалдың сыртқы жұмыстары толық аяқталып, күрделі жөндеу ғимараттың ішінде жалғасып жатыр.  

– Қызылорда облысының әкімі Н.Нәлібаевтың ұсынысымен, ҚТЖ компаниясының басқарма төрағасы Н.Сауранбаев пен Магистральдық желі дирекциясы филиалы басшысы С.Рахметовтің қолдауымен тарихи ғимаратқа күрделі жөндеу жұмыстары жүріп жатыр. Негізгі мердігерлер «Интеграстрой» және «Бірсүгір» серіктестіктері жұмысты белгіленген кестеден ерте аяқтауға күш салып жатыр. Сонымен қатар облыстағы кәсіпкерлер демеушілігімен жолаушылар пойызы қабылданатын станциялық екі жол платформасының беткі қабатына асфальт жабындысы төселіп, платформаға жарық шамдары орнатылды және перрон бойына жолаушыларға арналған орындықтар бөлінді. Құрылыс жұмыстары Қызылорда магистральдық желі бөлімшесінің директоры Ибраким Басықараев пен вокзал бастығы Жарас Қойшығұловтың бақылауында. Қазіргі таңда ғимараттың ішкі бөлмелерін әрлеу, су мен жылу жүйесін ауыстыру, сәндік элементтерін жаңарту жұмыстары жасалып жатыр, – деді НЖС директорының вокзал шаруашылығы жөніндегі орынбасары Нұрлан Мұсахметов.  

Вокзалдың алғашқы ғимараты 1905 жылы салынған, мемлекеттік қорғауға алынған тарихи, сәулет ескерткіші болып табылады. Жолаушыларға қызмет көрсету қалааралық және халықаралық бағыттарда жүргізіледі. Вокзал ғимаратының ескілігіне қарамастан жолаушылар үшін барлық жағдай жасалған. Компания тарапынан мүмкіндігі шектеулі жандар үшін вокзалда ұсынылатын сервистік қызметтерді пайдалануға ешқандай кедергі жоқ.  

Көне вокзалды көркейту жұмысы оның қасындағы 1969 жылы салынған 3 қабатты ғимаратқа да ағымдағы жөндеу жұмыстарымен жалғасуда.

Мердігер «Бірсүгір» компаниясы тарапынан вокзалдың сыртқы қасбетіне уақыт талабына сәйкес заманауи құрылыс материалдары пайдаланылып жатыр.  

– Күрделі жөндеу жұмыстары вокзал ғимаратының шатырынан басталып еденіне дейін жүргізіліп жатыр. Ескі вокзал ғимараты қабырғаларының іші-сырты қатты травертинмен қапталды, жалпы негізгі жұмыстың басым бөлігі жүргізіліп, тарихи ғимарат келбеті жаңарып, жаңа түрге енді. Бүгін 25 адам вокзалдың ішіндегі дәнекерлеу, сырлау, су жүйесін жаңалау, өрт қауіпсіздігі желісін орнату секілді жұмыстарды атқарып жатыр, сосын еденге сапалы керамикалық қыш тақта төсейтін боламыз, – дейді құрылысшылар атынан «Интеграстрой» мекемесінің шебері Руслан Жүнісқұлов.  

Жөндеу жұмыстарының барысы теміржол, облыс және қала басшыларымен келісіле отырып жасалуда. Бірнеше рет кездесу өтіп, жұмыс барысын ұйымдастыру, тиісті эскиздік дизайн мақұлданған.